Riba djamars 19 di òktober 2021 diputado di desaroyo ekonómiko i turismo Hennyson Thielman huntu ku Tourism Corporation Bonaire (TCB) a bishitá nos skolnan básiko pa asina entregá e di tres buki di turismo. E buki di turismo ta pa mucha di skol básiko di grupo 5 te grupo 8 i e título di e di tres buki di turismo ta ‘Turismo na Boneiru, un Eksperensia Outéntiko’. Esaki ta dediká na e eksperensianan outéntiko di Boneiru, inkluso su historia, flora i founa, aktividatnan i hopi mas.
“E buki edukativo aki ta duna un splikashon tokante diferente aspekto di nos sektor di turismo, por ehèmpel tokante nos kultura, aktividat ku por hasi na Boneiru, kiko ta atraé turista i e benefisio di turismo pa nos isla. E inisiativa aki ta forma parti di e vishon di e Plan di Rekuperashon di Turismo -Tourism Recovery Plan ku tin komo prioridat pa involukrá mas partisipashon di nos komunidat den desaroyo di turismo. Esaki lo yuda pa motivá nos komunidat pa mira no solamente e balor di e industria, pero pa embolbí nan tambe den e benefisionan i mira e diferente posibilidatnan di entrada,” segun diputado di turismo Hennyson Thielman.
Ku e buki aki Gobièrnu di Boneiru kièr involukrá nos hóbennan mas den desaroyo di turismo. Pa medio di e diferente historianan kièr konsientisá nan tokante e sektor i oumentá nan interes pa asina den futuro posiblemente nan bai traha den sektor turístiko di nos isla. E intenshon ta pa sigui ekspandé e inisiativa akí i organisá bishita den e sektor i organisá aktividat i treinen pa nos hóbennan por risibi mas informashon tokante e industria di turismo.
