Dia 11 di yüni pa promé biaha nos a selebrá Dia Internashonal di Wega. No muchu tempu pasá Nashonnan Uní a proklamá e dia aki. E último dos aña den kolaborashon ku UNICEF a selebrá e dia akí na Boneiru, Sint Eustatius i Saba. E tempu ei e no tabata Dia Internashonal di Wega ainda.
Importansia di wega i tempu liber ta un di e derechonan ku tin den Tratado di Derecho di Mucha. Awor ku a proklamá e dia akí ofisialmente, nan ta asentuá importansia di wega di nobo. UNICEF ta aploudí esaki. Pa desaroyo di mucha ta hopi importante ku nan por hasi wega.
E forsa di wega
Wega online òf offline ta forma un base importante pa futuro di mucha. For di un investigashon di Nashonnan Uní no muchu tempu pasá, a resultá ku 1 di kada 4 mucha so ta hunga pafó regularmente. Pa e motibu akí ta mas importante ainda ku via e dia di Nashonnan Uní ta bini mas atenshon pa wega. Pa medio di wega, mucha ta siña mas mihó.
Wega ta bon pa entre otro nan desaroyo intelektual, sosial, emoshonal i físiko. Hungando wega e muchanan ta siña por ehèmpel tambe pa hasi kontakto ku otro mucha. Nan ta siña kiko nan mester hasi ora den wega nan ta aktua komo lider. Mucha ta siña adaptá nan mes i superá miedu.
Influensia di bisindario
E bisindario kaminda mucha ta lanta ta importante, pasobra ta dependé di e bisindario si mucha por hunga. Pa mucha ta mas fásil pa hunga pafó ora tin sufisiente vegetashon den e bisindario, ora tin parke pa hunga kaminda nan ta topa ku sierto reto òf ora tin tiki tráfiko den e bisindario.
Por hasi wega riba kòmpiuter hopi mas dibertido, hustu, seif i edukativo, di manera ku mucha ta haña mas oportunidat pa desaroyá nan mes. UNICEF Hulanda ta enfatisá ku adultonan tin e tarea pa sòru ku mucha por hunga mas den nan bisindario. Si adultonan hasi esaki, nan ta kontribuí na bienestar di mucha.
Traha tempu pa wega i hasi kontakto
Wega ta importante tambe pa konekshon entre mayor i yu. Serka UNICEF, luna di yüni ta den signo di edukashon i paternidat. Den e luna akí ta dediká èkstra atenshon na e laso entre mayor i yu. E aña akí e tema ta: ‘E promesa di paternidat ku atenshon pa wega ’. Di e manera akí UNICEF ta purba haña mas atenshon serka mayornan pa hunga ku nan yunan.
Pa motibu di agèndanan yen, falta di sufisiente sèn i otro limitashonnan, tin ora pa famianan ta un reto grandi pa pone wega na promé lugá. Ku e kampaña “Quality Time”, UNICEF Hulanda den un video ta mustra ku ta kosnan hopi chikitu ta importante ora adultonan ta pasa tempu huntu ku mucha.
Den e seri, famianan na Boneiru, Sint Eustatius i Saba ta laga mira kiko nan ta eksperensiá den práktika i kon importante ta pa mayornan i yunan pa hasi wega ku otro. E luna akí UNICEF, via su kanal di facebook “UNICEF Dutch Caribbean”, ta kompartí mas storia inspirativo i mayornan ta interkambiá vários tep ku otro tokante paternidat i wega ku por hasi ku mucha.
UNICEF Hulanda tin un programa tambe pa interkambio di idea, esta e programa di Child Friendly Cities. Sint Eustatius ta partisipá na e programa akí. E aña akí pa Dia Internashonal di Wega, UNICEF Hulanda a manda un maleta yen di wega pa e islanan BES pa selebrá dia di wega.
Tambe skolnan a haña un tarea di pintamentu. E tarea tabata pa dia 11 di yüni e muchanan pinta nan momentu faborito di wega. For di awor tur aña 11 di yüni ta den signo di wega. I di e manera akí nos ta kumpli mas tantu ainda ku e derechonan di mucha ku tin den e Tratado di Derecho di Mucha di Nashonnan Uní. Pero ta keda importante pa mucha por hunga tur dia di nobo atrobe.
