Awe Boneiru ta selebrá Dia Internashonal di Derecho di Mucha, un momentu importante pa para ketu na derecho di kada mucha pa un futuro seif, salú i prometedor. Entidat Públiko Boneiru ta komprometé su mes aktivamente pa salbaguardiá e derechonan akí, den liña ku e Tratado Internashonal tokante Derecho di Mucha. Huntu ku e partnernan di kadena, Entidat Públiko Boneiru ta traha pa logra un komunidat kaminda nos muchanan por desaroyá nan mes optimalmente – físikamente, sosialmente, emoshonalmente i digitalmente.
Pasonan konkreto pa un Boneiru ku enfoke riba mucha
Den e lunanan tras di lomba a realisá logronan importante ku ta kontribuí na un desaroyo seif i un ambiente stimulante pa nos hóbennan:
· Munisipio kandidato pa UNICEF Child Friendly Cities Initiative
Boneiru a registrá pa e programa internashonal di UNICEF ku ta duna munisipionan sosten pa laga maneho i fasilidatnan enfoká mas riba mucha. Pa esaki dia 3 di novèmber diputado Peter Silberie a firma un Memorando di Akuerdo pa e palabrashonnan di kolaborashon. E mènedjer di programa pa hubentut di Entidat Públiko Boneiru ta responsabel pa kordinashon di e aktividatnan. E laso di kolaborashon ku UNICEF por kontribuí na mas partisipashon di hóben i na lantamentu di un Konseho di Hóben struktural, di manera ku ta skucha nan bos.
· Huramentashon di empleado públiko di enseñansa obligatorio
Dia 23 di òktober 2025 e empleado públiko di enseñansa obligatorio, Esther Zimmerman, a huramentá serka e hefe di Kuerpo Polisial Hulanda Karibense (KPCN). E huramentashon akí ta kontribuí na promoshon di derecho riba edukashon na Boneiru. Un kolaborashon estrecho ku mayornan/kuidadónan, skolnan i partnernan di kadena, manera e Sentro di Ekspertisio Enseñansa i Kuido (het Expertisecenter Onderwijs en Zorg) ta evitá ku tin mucha ta bandoná skol den forma prematuro (drop out), i e muchanan ta haña oportunidat pa desaroyá nan talentonan kompletamente. A fortifiká e tim di enseñansa obligatorio ku empleadonan nobo den e di tres kuartal di aña 2025.
· Esfuerso di kadena pa prevenshon di kriminalidat hubenil
- Den luna di yüni gabinete di gezaghèber i ofisina di e diputadonan a lansa un laso di kolaborashon den e kadena di hubentut pa Maneho Integral di Siguridat. Ku un enfoke spesífiko riba tendensianan den kriminalidat hubenil a traha diferente plan den vários grupo di trabou i enkuentronan di kadena. E plannan ta basá riba e Modelo di Barera pa prevenshon di un karera kriminal serka hóbennan. A evaluá e plannan tambe via konsultashon hubenil ku sosten for di Akseso, Stichting Reclassering CN i e empleado públiko di enseñansa obligatorio.
- Dia 22 di òktober 2025 gezaghèber John Soliano, Scholengemeenschap Bonaire (SGB) i Kuerpo Polisial Hulanda Karibense (KPCN) a firma e konbenio ‘Siguridat na i rònt di Skol 2025-2029’. Esaki ta enfoká riba un ambiente seif di edukashon pa tur alumno. E konbenio ta krea espasio pa sigui fortifiká e kolaborashon di kadena.
· Huntu ku partnernan lokal e areglo Maatschappelijke Diensttijd ‘Bo Granitu Pa Boneiru – BGPB’ a hasi trayektonan eksitoso posibel den deporte, arte, kultura i naturalesa. Danki na diferente partner e hóbennan por a atkerí eksperensia balioso i hunga un ròl aktivo den fortifikashon di nos komunidat. Miembronan di panel hubenil a partisipá na un promé interkambio di Partisipashon di Hóben BES na Sint Maarten den koperashon ku UNICEF. Tur aktividat di BGPB ta basá riba e pilánan enkuentro, desaroyo i traha huntu. BGPB a bira posibel pa medio di un kolaborashon fuerte entre e kordinadó di proyekto di BGPB, Ministerio di Enseñansa, Kultura i Siensia (OCW) i Maatschappelijke Diensttijd Nederland.
· E vishon pedagógiko di Boneiru, ku Konseho Insular a aprobá den luna di aprel 2025, ta brinda un base di puntonan di salida importante pa un ambiente di biba seif i prometedor. E vishon akí ta enfatisá ku mester eduká mucha ku amor, kuido i rèspèt. Ta trata di un aspirashon konhunto pa proveé den siguridat den ambiente di biba – tantu físikamente komo online. Interakshon positivo i bon ehèmpel di mayornan, edukadornan i profeshonalnan ta yuda nos muchanan pa deskubrí nan mes i e mundu rònt di nan. E aserkamentu akí ta konektá ku e balornan núkleo di UNICEF i UNESCO, den kua derecho di mucha, partisipashon, siguridat digital i akseso na informashon konfiabel ta sentral.
Nan ta rekonosé derecho riba enseñansa den e lenga materno komo esensial pa desaroyo kognitivo, formashon di identidat i konektividat kultural. Huntu ku mayornan, kuidadónan i partnernan di kadena nos ta traha pa logra un komunidat ku ta pedagógikamente responsabilisá, kaminda diálogo, kompartimentu di konosementu, sosten emoshonal i role model-nan positivo ta kontribuí na un kresementu prometedor. (Por lesa e teksto kompleto di e Vishon Pedagógiko Boneiru 2025 riba nos website www.bonairegov.com)
Entidat Públiko Boneiru, Direktorado di Komunidat i Kuido i e partnernan di kadena ta sigui komprometé nan mes inkansablemente pa garantisá ku ta mira, skucha i protehá kada mucha na Boneiru. Kada mucha tin derecho riba esaki i ta meresé esaki.
