E Dia di Suministradó 2025 ku a tuma lugá den Corralium Hotel Bonaire, tabata un éksito grandi. E evento a trese desénas di empresa lokal i regional huntu ku representantenan di entidat públiko Boneiru (EPB), entidat públiko Sint Eustatius (EPE) i otro institutonan públiko, entre otro Rijksdienst Caribisch Nederland (RCN). Meta di e dia akí tabata pa fortifiká kolaborashon, kompartí konosementu i krea oportunidat nobo pa kresementu ekonómiko duradero na nos islanan.
Durante e Dia di Suministradó, e empresarionan por a sera konosí ku e prosesonan di kompra di e entidatnan públiko – entre otro entidat públiko Boneiru i entidat públiko Sint Eustatius – i Rijksdienst Caribisch Nederland (RCN), i hasi pregunta tokante destaho, fakturashon i kolaborashon.
Tabatin seshonnan di informashon i momentunan di ret, kaminda e suministradónan i empleadonan di gobièrnu por a bai direktamente den kòmbersashon ku otro.
Un variashon di empresa a tuma parti na e dia, for di kompanianan di konstrukshon i mantenshon te suministradónan di artíkulo di ofisina i servisionan di limpiesa.
E organisashon ta wak bèk riba un dia inspirativo i produktivo. E asistensia grandi i e reakshonnan positivo di e partisipantenan ta konfirmá e nesesidat pa mas komunikashon i kolaborashon direkto entre gobièrnu i e mundu empresarial lokal.
