E proyekto Brùg pa Oportunidat ta un proyekto ku Entidat Públiko Boneiru a inisiá na kuminsamentu di aña 2021 ku e meta pa krea posibilidat di trabou pa e personanan ku a pèrdè nan entrada a konsekuensia di e pandemia di Covid-19. Pa por yuda e grupo di enfoke aki, Entidat Públiko Boneiru a pone medionan finansiero disponibel i via di Plenchi di Trabou a bin den kontakto ku esnan ku a pèrdè nan trabou pa motibu di e pandemia. E Direktorado di Planifikashon i Desaroyo huntu ku Selibon a yuda krea kupo di trabou pa e personanan aki. E trabounan ku ta ehersé den kuadro di e trayekto aki ta entre otro: rosa i kap mata, i mantenshon di área públiko.
Den e último lunanan ku a pasa ta varios trabou di limpiesa i mantenshon a tuma lugá prinsipalmente den diferente bario di Boneiru. Na Rincon e trahadónan a hasi trabou di limpiesa na: Plasa Broertje Janga, Plasa Hubentut i na e Gruta di Lourdes. Den e bario di Tera Corá a limpia parti pafó di Pal’í Tamarein i tambe un parti di Kaya Mgr. Niewindt. Na Nikiboko a hasi trabou di limpiesa na Parke Lanlan Clarenda parti pafó i tambe e trahadónan a traha na Te Amo Beach.
Awó ta sigui ku e trabounan na un area bèrdè den e bario di Belnem i ora terminá ei, nan ta bai kuminsá ku trabounan di limpiesa na e lugá di sambuya yamá Tolo i despues sigui kompletamente ku Kaminda Turístiko.
Ku e proyekto Brùg pa Oportunidat gobièrnu di Boneiru ta duna un man na tur esnan ku a pèrdè nan trabou a konsekuensia di e krísis di Covid-19 i alabes ta perkurá pa Boneiru keda limpi i bon mantené tantu pa su habitantenan komo pa e turistanan ku diariamente ta bishita e isla. Esaki sigur ta un desaroyo positivo.
