Departamento di Salubridat Públiko ta sera kaya pa tèst COVID-19 entrante 6 di aprel 2023

Ta sera e kaya di tèst pasó COVID-19 ta bou di kontrol awor. Meskos ku na Hulanda, ta konsiderá COVID-19 awor komo un malesa di infekshon normal mané fèrkout òf grip. Persona ku keho ku parse COVID-19, por tèst si mester serka nan dòkter di kas òf na hospital. Via dòkter di kas, hospital i laboratorio, departamento di Salubridat Públiko ta monitoriá si variante nobo ta plama. I tambe si por surgi un posibel brote nobo. 

Durante e brotenan di e vírùs di corona na 2020, 2021 i 2022 hopi hende na Boneiru a bira malu. Pero awendia esei a kambia. Esaki ta pasobra hopi hende a pasa angua kontra corona òf a haña COVID. Ku tempu e vírùs di corona tambe a kambia. Esei ta pone ku hende no ta bira hopi malu mas ora nan pega ku e vírùs. Pa e motibu ei no tin medida di corona mas pa basta tempu kaba na e isla.

Ta konsehá siudadano ku keho manera tosamentu, nistermentu, doló di garganta òf nanishi ku ta kore, pa nan keda kas si nan ta malu. Si nan tin keho leve, ta konsehá nan pa wak huntu ku dunadó di trabou si ta posibel pa traha na kas. Ta konsehá tambe pa evitá kontakto físiko ku hende ku por bira masha malu si nan pega ku bo malesa. Si kontakto físiko ta nesesario, por ehèmpel pa esnan ku ta kuida famia òf konosí, ta rekomendá pa bisti tapaboka. 

Persona ku ke, por pasa te ainda angua kontra corona na departamento di Salubridat Públiko. Nan por traha un sita di djaluna te ku djabièrnè di 08:00 -12:00 i di 13:30 – 17:00 via 0800 0800.