Di e manera akí e departamento ta krea mas konsiensia pa entre otro sierto desigualdatnan di salú ku nan tin di haber kuné. Esaki pasobra sali na defensa di gruponan minoritario i gruponan vulnerabel no solamente ta un obligashon moral, pero tambe un strategia importante pa mehorá salú públiko den su totalidat. Pa medio di dediká atenshon spesífiko na nesesidatnan di salú di gruponan minoritario i gruponan vulnerabel, por aspirá pa yega na redukshon di desigualdatnan di salú den nos komunidat.
Diskriminashon, stigma i desigualdat sosial ekonómiko por kondusí na resultadonan di salú mas malu. Pa medio di salbaguardá salú i bienestar di tur suidadano, departamento di Salubridat Públiko ta aportá na un komunidat mas salú i mas resiliente den su totalidat. Pa esaki huntu ku partnernan di kadena ta traha hopi riba servisionan aksesibel i inklusivo pa tur hende. Banda di esaki e departamento ta kontribuí aktivamente na kreamentu di un ambiente di biba kaminda tur hende ta haña oportunidat igual pa hiba un bida salú. Den esaki e departamento ta indiká ku promoshon di un komunidat salú no ta dependé solamente di salú físiko, pero tambe di dunamentu di sosten na bienestar i igualdat di tur individuo.
Departamento di Salubridat Públiko ta duna su sosten kompleto na selebrashon di igualdat, diversidat i inklusividat den komunidat boneriano. Pa e motibu akí e departamento ta hasi yamada na tur hende pa durante e siman akí sostené otro, brasa diversidat i traha riba un komunidat kaminda tur hende ta sigur, ta haña rèspèt i ta sinti nan mes apresiá. E ora ei huntu nos ta konstruyendo un futuro mas salú i mas inklusivo pa tur habitante di Boneiru.
