Na aña 2025 Entidat Públiko Boneiru a pone pasonan importante riba tereno di maneho di idioma i kolaborashon relashoná ku papiamentu i multilingwismo.
Den luna di febrüari Fundashon Akademia Papiamentu a selebrá su 15 aña di eksistensia. Pa hopi aña kaba e fundashon ta trahando estrechamente huntu ku Entidat Públiko Boneiru riba konservashon i fortifikashon di papiamentu na Boneiru.
Den luna di yüli Aruba, Boneiru i Kòrsou a renobá nan kolaborashon pa konhuntamente fortifiká papiamento/u. E akuerdo ku e islanan ABC a firma ta konta pa un periodo di tres aña. E ta enfoká riba inisiativanan konhunto pa enseñansa, desaroyo di material di instrukshon, profeshonalisashon di dosente i promoshon di idioma.
Den luna di yüli tambe Entidat Públiko Boneiru a firma un deklarashon di intenshon ku kuater direktiva di skol na Boneiru pa desaroyo di un método pa hulandes komo idioma strañero (Nederlands als Vreemde Taal – NVT). E partidonan akí a uni forsa pa yega na un método adekuá i duradero pa hulandes komo idioma strañero. Ku esaki nan ke konektá mas mihó ku realidat di idioma di alumnonan boneriano, pa kende hopi biaha hulandes no ta nan idioma materno.
Entrante 1 di òktober 2025 pa promé biaha Entidat Públiko Boneiru a nombra un ménedjer di programa pa idioma. E funshon akí ta responsabel pa desaroyo, ehekushon i garantia di e maneho di idioma multilingwe di Boneiru, ‘Di Chambuká pa Manehá’. E maneho akí ta konektá ku palabrashonnan nashonal i internashonal, manera e Manifesto Oropeo pa idioma regional òf idioma di minoria. Den esaki Entidat Públiko Boneiru ta traha huntu ku skolnan, gobièrnunan i organisashonnan sosial.
Den luna di novèmber Fundashon Akademia Papiamentu a haña enkargo di Entidat Públiko Boneiru pa renobá e método pa siña idioma ‘Bon Uso di Papiamentu’ i adaptá esaki na e situashon boneriano. Despues di esaki e fundashon lo ofresé kurso di e método akí den diferente área, manera enseñansa, hustisia, gobernashon públiko, medionan di komunikashon, kultura, sosial ekonómiko, kuido i bienestar, i espasio públiko.
Ku e pasonan akí Entidat Públiko Boneiru ta mustra ku e ta fortifiká multilingwismo i papiamentu strukturalmente, i semper den kolaborashon estrecho ku partnernan lokal i regional.
Pa pregunta of mas informashon por tuma kontakto ku sra Sharité Severina via sharite.severina@bonairegov.com
