Awe un delegashon di Boneiru ta sali pa Santo Domingo pa partisipá na Agro-alimentaria 2025 – e feria mas grandi di agro-industria den área karibense. E feria ta tuma lugá for di 28 te ku 31 di mei binidero i ta trese sentenáres di produktor, eksportadó i kumpradó for di e region huntu.
E delegashon boneriano ta konsistí di mas ku bintisinku partisipante for di e sektornan di agrikultura, krio di bestia, importashon, eksportashon i konstrukshon, komplementá ku representantenan di departamento di Asuntunan Ekonómiko, departamento di Agrikultura, Krio di Bestia i Piskamentu (LVV) i miembronan di Konseho Insular.
Durante e bishita, banda di partisipashon na e feria tin tambe vários bishita di trabou planiá, entre otro un bishita na negoshinan por mayor di material di konstrukshon i fábrikanan di kòkou i prosesamentu di kuminda. Nan ta bishitá embahada hulandes tambe i tin oportunidat pa kòmbersashon individual ku potensial suministradónan i partnernan komersial.
Diputado Abraham ta indiká ku e tipo di mishonnan komersial akí ta di balor grandi pa Boneiru: ‘E tipo di interkambionan stratégiko akí ta krea oportunidat pa kresementu i kolaborashon. Nos ta duna nos empresarionan espasio pa konektá nan mes ku merkadonan nobo i pa edifiká ‘partnership’-nan inovativo. Esaki ta di gran importansia pa un ekonomia boneriano ku ta resiliente pa futuro.’
Entidat Públiko Boneiru ta sostené e mishon komersial akí aktivamente i ta ofresé e empresarionan ku ta partisipá un kontribushon finansiero pa hasi nan partisipashon posibel.
Mas informashon: https://bonairegov.com/agro2025
Tokante e bolsa: www.agroalimentaria.com.do
