Kralendijk - Bon tardi, e siman ku ta tras di lomba tabatin su retonan pero danki Dios tambe su logronan positivo. Mi ta kontentu ku na Boneiru 450 hende a bakuná. Na Saba tin mil hende ku a bai bakuná te awor i na Statia mas o ménos seisshen. Mi ta spera ku na Boneiru pronto nos tambe tin mas hende ku ta bai bakuná.
Banda di personal den kuido ku kontakto ku pashènt, desde ayera a kuminsá bakuná otro personal ku tambe tin un funshon krusial den kuido.
Tin algun kos ku no a kana bon e siman akí. E sistema pa registrá tabatin problema. Ta p’esei hopi hende no por a kaba di registrá. Ta trahando duru pa kaba di resolvé esaki. Tin hende a yama bisando ku nan a registrá pero no a risibí un mail di konfirmashon ainda. E tim di call center ta hasi todo por todo pa kaba ku e retraso ku a surgi.
Mi ke pidi tur hende pa tene kuenta ku awor aki ta hende di 60 aña bai ariba ta na bùrt pa registrá pa bakuná. Si bo ta bou di 60 aña por fabor no yama ainda. Duna esnan di 60 aña p’ariba un chèns pa nan registrá. Ora ta bùrt pa hende bou di 60 aña registrá nos lo anunsiá esaki. E number 0800 0800 ta pa hende tambe t’ei pa hende ku tin keho ku por tin di aber ku COVID-19. Nan mester por keda yama si nan tin pregunta òf mester hasi tèst.
E siman akí tambe tabatin hende a yama call center pa nan puntra si nan por pasa e di promé angua aki na Boneiru, i e di dos por ehèmpel na Hulanda. Esaki no ta posibel. Personanan di afó ku ta temporalmente na Boneiru por bakuná ora nan ta na bùrt. Nan mester keda por lo ménos seis siman sí riba nos isla pa haña e promé i e di dos angua.
Kolegio Ehekutivo a tuma un desishon ofisial awe ku gezaghèber i diputadonan ta bakuná otro siman djárason na Cocari.. Nos ke duna e bon ehèmpel i motivá tur hende pa bai bakuná, meskos ku nos kolega mandatarionan di nos islanan ruman.
Por último mi ke bisa ku Boneiru ta haña sufisiente bakuna pa tur ku ke bakuná. Mi ta spera ku segun dianan ta pasa mas hende di 60 aña p’ariba ta bai bakuná. Pasa un un felis wikènt i laga nos sigui kuida.
