Relashoná ku e desishon di Kolegio Ehekutivo di Entidat Públiko Boneiru pa loke ta trata un investigashon independiente di echo ku nan ta bai laga hasi relashoná ku e prosedimentu rònt di un pèrmit di konstrukshon i un paro di konstrukshon imponé riba un tereno di un miembro di famia, diputado Cicilia ta duna e siguiente deklarashon:
‘Mi ta kompletamente di akuerdo ku transparensia, ku e prinsipio di ser kuidadoso i ku konfiansa di nos komunidat den atministrashon públiko. Pa e motibu akí mi ta sostené e desishon di Kolegio Ehekutivo pa laga hasi un investigashon independiente di echo kompletamente, i mi lo duna tur koperashon nesesario na esaki.’
Diputado Cicilia ta enfatisá ku e no tabata enbolbí ku e proseso di evaluashon òf toma di desishon relashoná ku e dunamentu di pèrmit en kestion. E ta apresiá ku awor akí na un manera ophetivo esaki lo keda determiná den kuadro di e investigashon ku ta bai laga hasi.
‘Mi ta kompletamente konsiente di mi responsabilidat komo mandatario i di importansia di inkoruptibilidat, tambe kaminda ta trata di aparensia. Esaki ta netamente e motibu pakiko di kurason mi ta aploudí un investigashon independiente, manera ku awor Kolegio Ehekutivo ta bai laga hasi bou di direkshon di gezaghèber. Esaki ta kontribuí na e transparensia ku nos komunidat tin mag di verwagt di nos i ku e ta meresé.’
Finalmente diputado Cicilia ta indiká ku e tin konfiansa ku e investigashon lo kana na un manera kuidadoso i independiente i e ta spera un splikashon klarito i basá riba echo di e proseso.
