Despues di a konsultá legislashon i regulashon vigente, Entidat Públiko Boneiru a yega na e konklushon ku no tin motibu pa keda sin duna Chogogo Dive & Beach Resort e pèrmit ku nan a pidi, si nan kumpli ku e kondishon adishonal pa sigurá ku no ta posibel pa santu di e bich resultá den laman. Pa logra esaki lo mester adaptá e muraya pa wanta e santu ku ya kaba nan a konstruí. Ta mantené e multa imponé a base di e konstatashon ku efektivamente a basha santu na un momentu ku no a otorgá pèrmit pa esei.
Pa loke ta trata su konseho Entidat Públiko Boneiru ta basa su mes riba ordenansanan lokal i nashonal, entre otro e Plan di Naturalesa Boneiru i e Plan di Maneho pa Naturalesa i Medio Ambiente Hulanda Karibense. Ademas, promé ku a pasa pa toma di desishon, Entidat Públiko Boneiru a pidi konseho di un partido eksterno independiente.
A hasi tambe un estudio ambiental: for di esei a resultá ku na aña 2015 a pèrmití un kontratista pa usa e mesun tipo di santu pa konstrukshon di un bich na e mesun sitio.
