Siudadanonan ku Pagabon ku ta bin na remarke pa e di dos kompensashon di koriente di 1.300 dòler, por buska nan token promé ku 16 di febrüari 2024 sin sita. Esei por na Direktorado Komunidat i Kuido, Kaya Neerlandia 41 di djaluna te ku djaweps di 09:00 – 12:00 or i di 14:00 - 17:00 or. Pa buska e token, siudadanonan mester bai ku un prueba di legitimashon bálido. For di 16 di febrüari 2024, siudadanonan por buska e token pa e di dos kompensashon di koriente solamente ku sita na Direktorado Komunidat i Kuido. Pa esaki nan por app òf yama 701 1055, òf manda un meil pa koriente@bonairegov.com.
Na desèmber di aña pasá a anunsiá ku siudadanonan ku anteriormente ya kaba a haña e kompensashon di koriente, outomátikamente ta haña e di dos kompensashon di 1.300 dòler. Mientrastantu WEB a prosesá e di dos kompensashon i paga esaki riba kuenta di klientenan ku un resibu di koriente mensual. Siudadanonan ku Pagabon por a haña nan token un tiki mas lat, pasobra ta kosta mas tempu pa traha token.
Hendenan ku promé no a pidi e kompensashon di koriente, por hasi esei ainda. Pa e kondishonnan pa pidi e kompensashon di koriente, bishita www.bonairegov.com/stroom. E kompensashon ta pa yuda siudadanonan ku mester di esei pa paga nan gastunan di koriente. Direktorado Komunidat i Kuido den video i poster tambe ta duna tep kon siudadanonan por spar koriente. Si spar koriente, siudadanonan por probechá mas tantu di e kompensashon di koriente.
Pa pregunta tokante e kompensashon pa koriente, hendenan por yama òf app na 701 1055. Òf meil koriente@bonairegov.com.
