‘Bootmeesterlicentie 3’ ta nesesario pa nabegá seif for di yanüari 2025

For di 1 di yanüari 2025 ta obligatorio pa tur doño i operadó di barku komersial na Boneiru pa ta den poseshon di un ‘bootmeesterlicentie 3’. E medida nobo akí ta parti di e Areglo Siguridat di Boto, yamá tambe Anekso 6 di boto. Esaki tin ku hasi nabegamentu mas seif na Boneiru. Tur hende mester kumpli ku esaki promé ku e fecha akí.

Kada biaha tin mas interes pa deporte akuátiko i nabegashon na Boneiru. Pa e motibu akí ta importante pa trese mas siguridat pa tur hende riba laman. Asina nos ta sòru ku tur hende por gosa na un manera seif. Bo tin ku tene kuenta ku lo siguiente:

1. Fecha inisial: For di 1 di yanüari 2025 tur hende mester tin e lisensia akí.

2. Pa ken: Tur hende ku tin un boto komersial òf ta nabegá ku un boto komersial. Bo mester tin un pèrmit di naturalesa tambe pa por nabegá den Bonaire National Marine Park (BNMP).

3. Dikon: Nos ke hasi laman mas seif, sòru pa hendenan por nabegá mas mihó i ku nan ta sinti nan mes responsabel.

4. Periodo di adaptashon: A pèrkurá pa un periodo pa kustumá ku e regla nobo akí. Durante e periodo akí tur doño i operadó di boto komersial por sigui un kurso temporal. Asina nan por sigui nabegá, miéntras nan ta buska nan lisensia.

Seshon di informashon den luna di febrüari

Den luna di febrüari Ofisina di Haf ta organisá un seshon di informashon pa duna mas splikashon tokante e regla nobo akí i e ‘bootmeesterlicentie 3’. Despues ta anunsiá e sitio eksakto i fecha di e seshon akí.

Pa buska e lisensia tin kurso disponibel na Boneiru. DRTC Kòrsou ta ofresé esakinan i dentro di poko Forma tambe. Pa informashon tokante gastu i otro informashon bo por manda un email na cura@drtc.nl. Si bo no tene bo mes na e areglo akí, wardakosta por tuma akshon, manera kontrolá bo boto i revoká bo pèrmit.

Bo ke sa mas? Tuma kontakto ku Boat Registration via boatregistration@bonairegov.com òf buska online stcrt-2021-38007 pa e areglo nobo kompleto ku a keda publiká den Staatscourant.

Ofisina di Haf i Inspekshon di Nabegashon Hulandes – Hulanda Karibense ta gradisí bo pa bo koperashon. Huntu nos ta sòru ku nos por nabegá mas seif i mas mihó riba nos bunita laman.