Boneiru ta partisipá na Earth Hour: djasabra nochi ta paga iluminashon rònt di Plaza Wilhelmina durante un ora

Riba djasabra 28 di mart 2026 Boneiru ta partisipá na Earth Hour. Den e kuadro akí for di 20:30 or te 21:30 or temporalmente ta paga e iluminashon públiko riba i rònt di Plaza Wilhemina, i na sierto partinan di Kaya Grandi i Kaya N.E. Craane. Iluminashon di e kupel riba Plaza Wilhelmina tambe ta paga. Na final ta sende tur iluminashon atrobe pa 21:30 or.
 

Ku e akshon simbóliko akí Boneiru ta djòin un movementu mundial, kaminda durante un ora largu, miónes di hende, organisashon i edifisio renombrá ta paga lus pa pidi atenshon pa mundu i pa importansia di konservashon di naturalesa. Mundialmente Earth Hour a krese i bira un momentu poderoso di konsientisashon i akshon konhunto pa nos planeta.
 

Earth Hour ta mas ku solamente paga lus durante un ora. E ta un momentu pa para ketu na loke kada un di nos por hasi pa un futuro mas sostenibel. Algun paso chikitu huntu ta hasi un diferensia grandi: paga lus ora no ta nesesario pa nan ta sendé, anda mas konsientemente ku koriente i awa, i skohe mas tantu biaha pa kustumbernan sostenibel den nos bida diario. Den esaki, pagamentu simbóliko di lus ta un gesto visibel i konektivo.
 

Entidat Públiko Boneiru ta hasi un yamada riba tur habitante, empresario i organisashon pa nan tambe partisipá riba djasabra 28 di mart pa 20.30 or. Na kas, na trabou òf den bario, durante un ora paga tur lus ku no ta nesesario i demostrá ku huntu Boneiru ta asumí responsabilidat pa un ambiente di biba sostenibel. Netamente pa medio di partisipá konhuntamente, nos ta manda un señal visibel i positivo: Nos isla, nos responsabilidat.
 

TCB tambe ta sostené e akshon akí pa medio di paga e lusnan di nan propio edifisio.
 

Huntu nos ta hasi Earth Hour visibel na Boneiru. Partisipá i asina bo tambe ta duna un ora pa mundu.