Habitabilidat den diferente bario na Boneiru ta bou di preshon. Esaki ta pa motibu di mantenshon atrasá na vários edifisio, tiki espasio na aire liber ku ta kualitativamente bon i un skarsedat di fasilidat. Pa atendé ku e problemanan akí, gabinete hulandes a lanta e Fondo di Bibienda Públiko (Volkshuisvestingsfonds – VHF). E fondo akí ta yuda munisipionan i regionnan pa invertí den mehorashon di bibienda den e áreanan mas vulnerabel. Ku éksito Boneiru a hasi un apelashon riba e fondo akí.
Finansiamentu pa Boneiru
Kolegio Ehekutivo a pidi ministerio di Asuntunan Interno i Relashonnan den Reino (BZK) pa habri e Fondo di Bibienda Públiko pa Hulanda Karibense tambe, inkluso Boneiru. E minister di Asuntunan Interno i Relashonnan den Reino a aprobá e petishon akí. E minister a disidí pa pone 5 mion euro disponibel pa restrukturashon di bibienda partikular na e islanan BES, di kua mas òf ménos 2,8 mion ta bai pa Boneiru.
Kiko esaki ta nifiká pa habitantenan boneriano?
E invershonnan for di e Fondo pa Bibienda Públiko por mehorá habitabidat, sostenibiidat i siguridat na Boneiru. Esaki por pa medio di remplaso di bibienda bieu, ehekushon di renobashonnan grandi, drechamentu di espasio públiko i mehorashon di fasilidat.
“Nos ta hopi kontentu ku esaki. Awor nos por hasi un apelashon riba e fondonan akí ku ta bai yuda nos ku mehorashon di habitabilidat den nos barionan. Den e tempu binidero nos ta bai spesifiká nos petishon mas aleu,” segun diputado Anjelica Cicilia. “Esaki ta nifiká ku nos por traha riba un aserkamentu ku enfoke riba bario pa un ambiente di biba mas mihó i mas seif i gastunan di energia mas abou.”
