Bo ta bishitá Boneiru dentro di poko?

Tur no-residente ku bishitá Boneiru, tantu ku avion komo ku boto di plaser, tin ku paga impuesto di turista (Visitor Entry Tax) promé ku nan yegada na nos isla. E suma total ta $75 pa persona pa tur hende for di 13 aña bai ariba. Mucha te ku 12 aña ta paga $10 pa persona.

Tarifa spesial pa residentenan di Kòrsou, Aruba, Sint Maarten, Saba i Sint Eustatius

Residentenan di e islanan di e anterior Antia Hulandes por bini na remarke pa un tarifa spesial di $10, si nan por mustra un sédula bálido ÒF un ekstrakto di Registro Sivil (no mas bieu ku 3 luna) ku ta komprobá ku nan ta residente di un di e islanan akí. Paga tinu: si bo no por mustra un di e pruebanan akí, bo tin ku paga e suma regular di $75. Na yegada na aeropuerto outoridatnan ta kontrolá e pruebanan i ta skèn e QR-code komo komprobante di pago.

Paga online te 7 dia promé ku  yegada pa garantisá un proseso rápido

Pa garantisá un akseso rápido na nos isla, nos ta konsehá bishitantenan fuertemente pa regla e pago akí adelantá online via e wèpsait ofisial di Entidat Públiko Boneiru: https://tourismtax.bonairegov.com. Por hasi esaki ku creditcard òf via Ideal. E ora ei na yegada solamente tin ku skèn e QR-code ku bo a optené. Eventualmente bo por paga tambe na yegada na aeropuerto di Boneiru, ku creditcard òf bo por swaip. Pago kèsh no ta posibel.

Kuidou pa bo no paga muchu hopi via rebendedó i paga via nos wèpsait ofisial!

Entidat Públiko Boneiru ta atvertí bishitantenan pa bendedónan eksterno ku ta ofresé servisio di Visitor Entry Tax kontra tarifanan hopi mas haltu. E wèpsaitnan akí hopi biaha ta kobra gastunan innesesario bou di e preteksto di un ‘servisio’. Hopi biaha e bendedónan eksterno akí ta manda e QR-code ku un retraso di tin ora asta 3 ora. Pa e motibu akí e riesgo ta eksistí ku na yegada na Boneiru bo no por mustra un komprobante di pago i bo tin ku paga di nobo. Ta konsehá bishitantenan urgentemente pa paga e Visitor Entry Tax direktamente via e wèpsait ofisial pa evitá gastu innesesario: paga tinu ku ekstenshon di e lenk ta kaba ku bonairegov.com. Entidat Públiko Boneiru nunka no ta kobra gastu na momentu di kumpra un QR-code.