Biblioteka Públiko Boneiru, parti di Entidat Públiko Boneiru, ta orguyoso di anunsiá ku a nomin’é ofisialmente pa e título di “Organisashon di gobièrnu mas Positivo di Aña di “Big improvement Day, BID - Dia di Mehorashon Grandi”. E nominashon a kohe biblioteka ful di sorpresa, ta konsiderá e nominashon komo un rekonosementu spesial i alentador pa trabou diario ku e organisashon ta hasi pa komunidat boneriano.
Tokante e nominashon
“Big Improvement Day” (BID) ta un plataforma anual ku ta promové positivismo, inovashon i kooperashon den gobièrnu i komunidat empresarial. E premio pa “Organisashon di Gobièrnu Mas Positivo” ta koroná instansia ku ta destaká den nan manera di traha ku ta radia optimismo, inovashon i kolaborashon. E echo ku a nominá un organisashon di Boneiru ta suprayá ku pafó di e isla tambe nan a mira i rekonosé importansia di biblioteka.
Importansia pa Boneiru
Biblioteka Públiko Boneiru tin un ròl sentral den edukashon, kultura, i desaroyo di komunidat. E nominashon ta rekonosementu pa dedikashon di e tim i di efekto positivo di programa dirigí riba promoshon di lesamentu, kompartí konosementu i konekshon sosial. Ta un momento di orguyo pa kolaboradó i pa komunidat di Boneiru.
Jenifer Pocornie-Martis, hefe di departamento ta komentá: “Pa nos heful e nominashon akí ta manera konfirmashon ku nos rumbo stratégiko ta e rumbo korekto. Nos ta invertí konsientemente den un biblioteka ku no ta ofresé buki so, pero ta un lugá tambe kaminda siñamentu, enkuentro, i kresementu ta pará sentral. Nos mishon ta pa duna kada habitante di Boneiru e oportunidat pa desaroyá su mes, di lesadó yòn te adulto en buska di konosementu. E echo ku ta wak nos awor komo un organisashon di gobièrnu ku ta positivo i ku bista pa futuro, ta bisa basta di esfuerso di nos tim i forsa di nos komunidat. Huntu nos ta konstruí un biblioteka ku ta aksesibel, inovador i ta konektá. E nominashon akí no ta pa nos so sino pa Boneiru henter tambe.”
Yamada: Vota promé ku 17 di desèmber 2025
EPB i biblioteka ta hasi un yamada na tur habitante di Boneiru - i tur hende ku kurason pa e isla i pa bilioteka, - pa depositá nan voto pa Biblioteka Públiko Boneiru.
Por vota te ku 16 di desèmber 2025, via:
Kada voto ta konta i ta yuda pa hasi Boneiru mas visibel riba tarima nashonal i internashonal. EPB i biblioteka ta enkurashá negoshi, skol, asosiashon i medio di komunikashon pa kompartí e notisia positivo aki i sigui plama e notisia.
Anunsio
Ta anunsiá e ganadó dia 20 di yanüari 2026, durante e “Dia di Mehorashon Grandi” na Teatro Real na Den Haag.
Palabra di gradisimentu
EPB i biblioteka ta gradisí nan miembro di tim dediká, tur boluntario i partner. E nominashon akí ta un rekonosementu bunita pa nan kontribushon na un sosiedat ku ta siña, ta konektá i ta resiliente.
