Kralendijk - Biblioteka Públiko a haña donashon di un kantidat di kasi 140 buki for di Hulanda. E persona ku a hasi e donashon aki ta Hans Michels, ku tin bon rekuerdo di Boneiru. Biblioteka Públiko ta mashá kontentu ku e bukinan ku nan a risibí for di Hulanda.
Na Hulanda Michels tabata bende su bukinan online. Mirando ku esei no ta posibel mas ela disidí di hasi un donashon na Biblioteka Públiko di Boneiru. Ta trata di bukinan di novela, ditèktif, bukinan pa mucha di tur edat, buki tokante naturalesa i historia. Pa amantenan di kushina tambe tin bukinan di reseta. Tin den e kolekshon ku a regalá Biblioteka Públiko bukinan tokante arte, buki di obra di man. Tin buki tokante sierto estudionan, filosofia i esotériko. Tambe Michels a duna un gran kantidat di buki na Ingles, bukinan na Aleman. Tur e gastunan di transporte di e bukinan di Hulanda pa Boneiru, Michels a tuma na su enkargo.
Despues ku Biblioteka Públiko kaba di registrá e bukinan, nan lo ta riba rèki pa miembronan. Ta invitá tur ku ainda no ta miembro pa mèldu pa nan tambe por disfrutá di e bukinan ku ta disponibel na Biblioteka Públiko Boneiru. Ku e bukinan aki Biblioteka Públiko Bonaire ta krea e posibilidat pa tantu mucha komo adulto amplia nan konosementu riba diferente tereno i materia.
