A konstatá sarampi serka un persona estranhero na su yegada na Boneiru. E personan akí a haña e infekshon pafó di Boneiru i dia 1 di febrüari el a yega nos isla ku un barku di karga for di Aruba. Inmediatamente a interná e persona den hòspital. GGD Boneiru i Fundashon Mariadal a tuma medida pa evitá plamamentu di e malesa.
Kiko ta sarampi?
Sarampi ta un malesa sumamente kontagioso kousá pa un vírùs. Hopi biaha e malesa ta kuminsá ku kentura, malestar, fèrkout, wowo kòrá i tosamentu. Despues di 3 pa 7 dia, mancha kòra ta sali riba bo kueru. Esaki ta kuminsá mayoria biaha tras di orea i despues nan ta plama riba henter bo kurpa.
Bo por haña sarampi si bo no a yega di haña e malesa akí anteriormente i bo no a pasa angua kontra sarampi. Mucha hopi biaha ta pasa angua kontra sarampi via un ofisina di konsulta. Pa e motibu akí masha tiki biaha tin sarampi na Boneiru.
Kiko GGD ta hasi?
GGD ta hasi investigashon di kontakto pa haña e hendenan ku posibelmente tabatin kontakto ku e pashènt. Hende ku ta kore mas tantu riesgo, ta haña konseho personal. Si ta nesesario, nan ta duna un tratamentu preventivo (PEP). Den esaki GGD ta traha huntu ku Fundashon Mariadal.
Kiko esaki ta nifiká pa nos habitantenan?
E kantidat di hende ku a kore mas tantu riesgo, na e momentu akí ta limitá. GGD a identifiká e personanan ku tabatin kontakto estrecho ku e pashènt i ta monitoreá nan situashon di salú. Habitantenan ku no tabatin kontakto direkto ku e pashènt, no tin mester di hasi nada awor akí.
Mas informashon
Por haña mas informashon na RIVM - https://www.rivm.nl/mazelen
Si bo tin pregunta, tuma kontakto libremente ku nos via telefòn: (+599) 715 5324 òf email IZB@bonairegov.com
