Kolegio Ehekutivo di Boneiru a duna enkargo pa dos investigashon pa loke ta trata konsekuensia di kimamentu di shushi, ku Environmental Compliance Limited (ECL) i Rijksinstituut voor Volksgezondheid en Milieu (RIVM) a hasi. Resultado di e dos rapòrtnan akí ta ofresé konosementu importante di e impakto ku kimamentu di shushi tin riba medio ambiente i salú públiko i nan ta forma e base pa mas akshon di parti di Kolegio Ehekutivo.
Investigashon di ECL: midimentu di emishon na e instalashon di kima shushi di Selibon N.V.
Den luna di febrüari 2024 ECL a ehekutá un midimentu di emishon na salida di e chimenea di e instalashon di kima shushi pa shushi biomédiko. Pa motibu ku bientu por plama e gasnan i partíkulanan, no por pone un vínkulo direkto entre eksposishon na hende i e supstansianan den suela. E konklushonnan mas importante ta:
- E normanan di emishon pa supstansianan dañino ku por kousa iritashon na via respiratorio i wowo a keda surpasá.
- Posibel eksposishon di e bisindario na aire i suela kontaminá durante e añanan ku e instalashon pa kima shushi tabata operashonal (2018 – 2023).
Aparte di esaki no a topa ku konsentrashonnan mas haltu di supstansia dañino den e muestranan di suela for di e investigashon di suela ku Riskcontrol a hasi den luna di febrüari 2024.
Investigashon di MOD: impakto di e kandela na lèntfel
Despues di e kandela na e sitio pa depositá shushi na Lagun dia 5 di novèmber 2024, RIVM a investigá muestra di suela, di mata i di loke nan a bari. E konklushonnan mas importante ta:
- Pa kasi tur metal pa kua ta eksistí balornan límite pa salú, no a konstatá ku a surpasá esakinan.
- Den muestra di suela i muestra for di loke nan a bari a topa ku konsentrashonnan mas haltu di chumbu, posibelmente prosedente di otro fuentenan.
- E riesgo pa eksposishon na hidrokarburo aromátiko polisíkliko (polycyclische aromatische koolwaterstoffen – PAK’s) i dioksina via suela no a bira mas haltu. Dentro di un rayo di 2 kilometer klaramente a haña konsentrashonnan mas haltu di dioksina riba mata, manera ya kaba a kompartí den un mensahe provishonal dia 5 di novèmber 2024.
- E konsehonan pa habitantenan ta keda sin kambio: evitá komementu di bèrdura ku hende ta kome su blachi, manera entre otro spinashi, kròpsla, paksoi, bembe etc., fruta ku bo no a laba i produktonan di bestia for di e área di impakto te ku 2 kilometer.
Akshon di Kolegio Ehekutivo
A base di e resultadonan di e investigashon, Kolegio Ehekutivo:
- Ku efekto inmediato a suspendé uso di e instalashon di kima shushi. No ta bai hasi uso di e instalashon mas.
- A duna enkargo pa investigashon adishonal pa haña mas konosementu di e posibel konsekuensianan riba término kòrtiku i término largu pa salú públiko.
- A disidí pa huntu ku RIVM i otro partnernan di konosementu desaroyá un programa amplio di investigashon pa identifiká fuentenan di kontaminashon i pa tuma medida pa evitá mas kontaminashon.
Kolegio Ehekutivo ta tuma posibel riesgonan na serio i ta aktua ku determinashon pa loke ta trata elaborashon i implementashon di posibel solushonnan duradero.
Transparensia i komunikashon
Pa tene habitantenan di Boneiru na altura di e último desaroyonan, Kolegio Ehekutivo lo manda un komunikado pa prensa. Banda di esaki e rapòrtnan kompleto di ECL i MOD ta disponibel riba wèpsait di Entidat Públiko Boneiru (EPB).
Pa mas informashon bishitá:
https://bonairegov.com/pa/habitante/investigashonnan-di-naturalesa-boneiru
