Awe ta marka un logro importante den e lucha kontra kambio di klima na Hulanda Karibense (Boneiru, Sint Eustatius i Saba). Ku orguyo Fundashon CAS (Climate Adaptation Services) ta anunsiá lansamentu di e Atlas di Efekto di Klima Hulanda Karibense, un instrumento krusial pa haña bista den e konsekuensianan di kambio di klima pa e islanan akí.
Na un manera aksesibel e Atlas di Efekto di Klima Hulanda Karibense ta presentá e konosementu disponibel tokante e konsekuensianan di kambio di klima pa Hulanda Karibensa. E atlas akí ta di balor pa un públiko amplio ku ta varia di gobièrnunan te komunidatnan.
E atlas ta trese konosementu aktual tokante kambio di klima huntu na un sitio sentral, di manera ku e ta bira un fuente balioso pa tur hende ku ta okupá nan mes ku e impakto di kambio di klima na Hulanda Karibense. Gobièrnunan, habitantenan i komunidatnan por hasi uso di e atlas pa komprendé e konsekuensianan di kambio di klima den nan region spesífiko. Esaki ta kontribuí na desaroyo di plannan efektivo pa adaptashon di klima.
Realisashon di e atlas ta resultado di un kolaborashon estrecho entre Reino, Fundashon CAS, vários instituto di konosementu i organisashonnan lokal, entre otro: Dutch Caribbean Nature Alliance (DCNA), Entidat Públiko Boneiru, Museo Terramar, STINAPA, EcoVision, Wageningen Environmental Research (WENR), Koninklijk Instituut voor Taal-, Land- en Volkenkunde (KITLV), Technische Universiteit Delft (TU Delft), Rijkswaterstaat (RWS), Informatiehuis Marien, Deltares i Rijksdienst voor Ondernemend Nederland (RVO). Ministerio di Infrastruktura i Maneho di Awa a duna sosten finansiero.
E Altlas di Efekto di Klima Hulanda Karibense ta públiko i disponibel grátis pa tur hende. Via e wèpsait bes.climateimpactatlas.com por konsultá e atlas i optené konosementu tokante e efektonan di klima na Hulanda Karibense.
Den e añanan binidero lo amplia e atlas mas aleu. E ambishon ta pa desaroyá mapa spesífiko pa Sint Eustatius i Saba, i pa inkluí eksperensianan di habitantenan di e islanan akí den e atlas.
E Atlas di Efekto di Klima Hulanda Karibense ta un instrumento importante pa por komprendé i atendé ku kambio di klima na Hulanda Karibense. Pa medio di e kolaborashon entre vários partido i hasiendo uso di eksperto, e atlas ta ofresé un fuente balioso di informashon pa un variedat amplio di interesado.
Fundashon CAS ta hasi un yamada riba tur hende pa eksplorá e atlas i partisipá na e kòmbersashon tokante riesgo di klima. Huntu nos por aportá aktivamente na komprenshon di i atendementu ku e desafionan ku kambio di klima ta trese kuné pa Hulanda Karibense.
