E tema di e aña akí ta ‘Gi-ga-bèrdè’ i ta bai tokante naturalesa. Pa e Siman di Buki di Mucha tur mucha ta bon biní pa bishitá biblioteka pa lesa òf fia buki relashoná ku e tema di e aña akí. E apertura festivo di Siman di Buki di Mucha ta tuma lugá riba djadumingu 13 di novèmber entre 16:00 or i 18:30 or riba e lugá di stashoná outo na Kaya Gramèl s/n i tur hende ta bon biní pa ta presente na e okashon akí.
E aña akí den un forma festivo Biblioteka Públiko Boneiru ta selebrá Siman di Buki di Mucha ku tur skol básiko i klas 1 i 2 di Komunidat di Skol Boneiru (SGB) VMBO i Liseo. Durante e Siman di Buki di Mucha e énfasis ta riba ‘sostenibilidat’. Por pensa akí riba por ehèmpel plantamentu di bo propio kuminda, resiklahe, ser konsiente di medio ambiente etc. A invitá diferente orador ku ta bin konta algu tokante sostenibilidat. Durante e siman akí ta bai organisá vários aktividat tokante e tema akí na biblioteka i na nos skolnan. E meta ta pa duna nos muchanan mas konosementu tokante naturalesa i sostenibilidat. Mediante e oradornan i e bunita oferta di buki ku ta bai tokante e tópiko aki, ta stimulá nos muchanan pa pensa tokante e tema akí. Nos muchanan ta e futuro di Boneiru i pa medio di inspirá nan pa biba na un manera mas sostenibel, nan tambe lo por duna un aporte na futuro sostenibel di nos isla.
Siman di Buki di Mucha ta un tradishon anual i e aña akí lo ta e di 30 edishon ku Biblioteka Públiko Boneiru ta organisá. Biblioteka ta hasi esaki pa promové abilidat pa lesa serka nos hóbennan. Pa medio di stimulá lesamentu, papia tokante buki i organisá diferente aktividat ku tin di haber ku idioma, por stimulá abilidat pa lesa serka mucha. Lesa i tambe lesa pa mucha tende ta hopi importante i ta forma e base den desaroyo di idioma i lesamentu serka mucha i e oportunidatnan ku nan ta haña na skol i den komunidat. Banda di esaki lesamentu no solamente ta sòru pa mucha pensa, pero ta siña nos muchanan tambe kon nan por komprondé otro hende mas mihó. Pa mas informashon tokante e Siman di Buki di Mucha i tokante biblioteka públiko por yama 715 – 5344.
