Durante e marchanan di karnaval ku ta tuma lugá e wikènt akí, Direktorado di Supervishon i Mantenshon di Lei ta tene kontròl na stèntnan di kuminda, sitionan di hóreka i puntonan mobil di benta a lo largo di e ruta.
Promé ku e evento, Direktorado di Supervishon i Mantenshon di Lei a informá tur doño di stènt i grupo di karnaval tokante e instrukshonnan vigente di higiena i seguridat. E Direktorado a dediká atenshon spesífiko na e manera di prepará i warda kuminda, maneho di temperatura, higiena personal i seguridat kontra kandela.
Riba kiko ta kontrolá?
E kontròlnan ta enfoká entre otro riba:
- E manera di prepará i warda kuminda (e temperatura korekto na momentu di fria i tene kayente)
- Sistema di traha higiéniko i higiena personal
- Evitá kontaminashon krusá
- E manera di warda produktonan na un manera korekto
- Presensia di material pa paga kandela i seguridat general kontra kandela
- E manera ku stènt ta organisá i seguridat di esaki
Responsabilidat propio
Empresarionan mes ta responsabel pa kumpli ku e instrukshonnan vigente di higiena i seguridat. Na momentu ku konstatá violashon, Direktorado di Supervishon i Mantenshon di Lei por tuma e medidanan adekuá mesora.
E Direktorado ta konta ku koperashon di tur esnan enbolbí pa huntu nos por sòru pa aktividatnan seif i festivo di karnaval.
