Siudadanonan ku tin mester di protekshon èkstra, den luna di novèmber por pasa angua kontra corona ku un bakuna nobo. Ta konsehá e angua pa hende di 60 aña bai ariba i pa hende entre 18 i 60 aña ku tur aña mester pasa e angua di grip. E bakuna nobo ta intenshoná tambe pa hende muhé na estado i pa hende ku por ehèmpel preshon haltu, diabétis, problema ku pulmon i nir, i trahadónan den kuido. E angua nobo kontra corona ta nesesario pa motibu ku e bakunanan anterior no ta protehá sufisientemente kontra e tiponan nobo di corona.
E bakuna nobo ta protehá hende ku un salú vulnerabel kontra hospitalisashon debí na kontagio ku e variantenan nobo di e vírùs di corona. Di e manera akí e chèns ku hende ta muri pa motibu di corona ta bira mas chikitu. Ketu bai e vírùs di corona ta keda lanta kabes.
P’esei prinsipalmente pa hende vulnerabel ta importante pa nan protehá nan mes kontra e vírùs. I ta importante tambe pa hende salú ku tin un hende vulnerabel rònt di nan, tambe bai pasa angua. Di e manera akí hende salú por protehá e personanan vulnerabel rònt di nan.
For di 30 di òktober 2023 te ku 3 di novèmber 2023 trahadónan den kuido ku ta deseá esaki, ta pasa angua promé. For di 6 di novèmber 2023 te 1 di desèmber 2023, siudadanonan ku ta deseá esaki por pasa e angua kontra corona. Nan por hasi esaki den sentro di bario na Antriol, Nort’i Saliña, Rincon i Tera Kòrá.
Despues ta anunsiá dia i orario. Siudadanonan ku ta pasa angua den bario, no tin mester di traha sita pa esaki. Un tim di departamento di Salubridat Públiko por bai den bario pa pasa hende angua na kas tambe, si ta difísil pa nan bai sentro di bario. Bo tin pregunta tokante e angua nobo kontra corona? E ora ei yama e number grátis 0800-0800 durante ora di ofisina.
