Resientemente den un informe den medionan di komunikashon lokal, nan a sugerí ku Gezaghèber di Boneiru no a aktua den un forma transparente, pa motibu ku e lo no tabata kier a duna oportunidat pa mira resultado di e investigashon den e fail di konstrukshon relatá na un miembro di famia di e anterior diputado Cicilia. Gezaghèber ta refutá e sugerensia akí enfátikamente i ta duna un splikashon di e manera ku e investigashon a kana i publikashon di esaki.
Na luna di mei 2025, despues di un notifikashon, a imponé un paro di konstrukshon riba un miembro di famia di e diputado di Planifikashon i Desaroyo di e tempu ei. Komo medida di prekoushon i na interes di transparensia i pa evitá kualke aparensia di aktuashon no-íntegro, Kolegio Ehekutivo a disidí pa laga hasi un investigashon independiente di echo. Komo konsekuensia di resultado di e investigashon di echo, Gezaghèber a disidí pa laga hasi un investigashon dirigí riba un persona spesífiko. Enfoke di e investigashon akí tabata pa determiná si tabatin kestion di (un aparensia di) konflikto di interes, influensiamentu òf faboresimentu di parti di e (anterior) diputado.
Despues di entrega di resultado di e investigashon di kontinuashon akí, dia 8 di desèmber 2025 Gezaghèber a kompartí esaki ku Konseho Insular. Ku esaki e resultado akí a bira públiko tambe. Tambe Gezaghèber, pa medio di un informe pa prensa, a informá pueblo tokante presentashon i núkleo di e resultado.
Komo konsekuensia di un petishon pa publisidat, entidat públiko Boneiru e luna akí a kompartí resultado di e investigashon direktamente tambe ku un periodista.
Gezaghèber ta lamentá ku den e informe relashoná ku e publikashon akí, nan ta insinuá ku deliberadamente a tene informashon atras. Sin duda ningun momentu e ta rechasá e insinuashon akí. Na tempu, i kumpliendo ku su deber, Gezaghèber a informá Konseho Insular, ku ta e órgano designá pa duna un huisio polítiko tokante e resultado. E konklushon ku den medionan di komunikashon nan ta konektá na e manera ku publikashon di e fail akí a kana, en realidat no ta korekto. Pa e motibu akí Gezaghèber ta spera ku e medionan di komunikashon ku a saka e konklushon akí, ta rekonsiderá i koregí esaki.
Transparensia ta un balor importante den nos demokrasia. Gezaghèber ta i ta keda komprometé pa den desempeño di su funshon, duna kontenido na e balor akí konforme su honor i konsenshi.
