Tur djaweps mainta empleadonan di biblioteka ta lesa pa mucha di diferente krèsh tende. Adelantá nan ta aserká e krèshnan pa asistí na e aktividat di lesa pa mucha tende na biblioteka. Riba petishon di e akohidanan pa mucha nan ta organisá aktividat di lesa pa mucha tende pa alumnonan di entre 4 pa 12 aña tambe den oranan di tra’i mèrdia. Di e manera akí Biblioteka Públiko ke aportá na e kultura di lesamentu serka nos muchanan na Boneiru i alabes ta sostené e mayornan pa medio di aktividat di lesa pa mucha tende.
‘Lesa pa mucha tende ta importante pa desaroyo di idioma di mucha. Banda di esei e ta duna un aporte positivo na stimulashon di plaser den lesamentu. Esaki ta konta pa mucha yòn i pa e alumnonan di den enseñansa avansá’, asina Sharité Severina ta indiká komo konsehero di maneho na Biblioteka Públiko Boneiru. Biblioteka ta kuminsá ku e muchanan mas chikitu den oranan di mainta kaminda un empleado di biblioteka den un forma interaktivo ta lesa pa e muchanan tende. ‘Esaki ta sòru pa struktura serka e muchanan akí i e ta hasi ku lesamentu pa mucha tende ta predisibel i interaktivo. E mucha ta haña espasio pa pensa huntu ku e persona ku ta lesa pa e tende pa medio di duna kontesta riba pregunta. Pero tambe na un edat tempran e ta sera e muchanan konosí ku kon pa tene un buki den nan man i purba na lesa esaki. Naturalmente nos tin gana di mira tur mucha ku buki den nan man!’, segun Severina.
Algun tep útil pa lesa na un manera plasentero i interaktivo ta por ehèmpel:
- Introdusí e kuenta: Huntu tira un bista riba e kaft i e ilustrashonnan den e buki. Seguidamente bo ta laga e muchanan purba rei tokante kiko e kuenta lo bai. Puntra por ehèmpel tokante ken e kuenta ta bai, na unda e kuenta ta tuma lugá òf kiko probablemente lo bai pasa den e kuenta.
- Lesa e kuenta pa e muchanan tende. Segun bo ta lesa bo ta hasi pregunta tokante e kuenta i bo ta splika konseptonan interesante òf difísil.
- Na final bo ta papia tokante e kuenta ku e muchanan. Puntra e muchanan si loke nan a rei tabata klòp i laga nan konta kon e kuenta a kuminsá, kiko e problema tabata, kua solushon tabatin pa e problema i kon e kuenta a yega na su fin.
Bo tambe ke lesa na kas pa bo yu(nan) tende, pero bo tin nesesidat di mas òf otro buki? E ora ei bira miembro di Biblioteka Públiko Boneiru i huntu boso ta eksperensiá hopi plaser ku lesamentu! Te ku 18 aña miembresia ta grátis. Si bo tin mas ku 18 aña miembresia ta kosta $ 6,- pa aña. Miembronan por hasi uso grátis tambe di nos biblioteka online. Pa mas informashon yama 715 5344 òf bin bishitá nos na Kaya Gramèl s/n.
