A konstatá supuesto infekshon di chikungunya serka habitante na Boneiru

Dia 20 di mart a konstatá un supuesto infekshon di chikungunya serka un habitante di Boneiru. Ainda mester konfirmá e diagnósis ku investigashon adishonal di laboratorio. Durante un biahe pa Sürnam e persona akí a haña keho ku ta kuadra ku un malesa di sangura i ora el a regresá Boneiru el a hasi tèst. Probablemente e persona akí a haña e posibel infekshon un siman promé na Sürnam.

For di kuminsamentu di e aña akí Sürnam ta enfrentá un kantidat di infekshon di chikungunya ku ta oumentando fuertemente. Anteriormente e aña akí Aruba tambe a mèldu algun infekshon di chikungunya serka biaheronan ku a regresá for di Sürnam. Banda di esaki, den otro paisnan den region, manera Cuba i Guyana, tambe tin brote di chikungunya aktualmente.

E tim di kontròl di vector di GGD Boneiru / Salubridat Públiko, a tuma medida apropiá kontra sangura den i rònt di bibienda di e persona akí, pa evitá plamamentu di e vírùs.

Chikungunya ta un vírùs ku sangura ta transmití i ku ta kousa síntoma ku ta parse grip, manera kentura, doló di kabes, doló di múskulo, walmentu di stoma i rebultashon di kueru. Mayoria biaha e infekshon ta desaroyá na un manera leve, pero hopi biaha tin kestion di keho di skarnir i tin ora esaki por kontinuá pa vários luna.

Tuma kontakto ku bo dòkter di kas si bo tin e kehonan menshoná akí riba, prinsipalmente si resientemente bo tabata den un área kaminda tin chikungunya. Mas informashon tokante kon bo por protehá bo mes kontra sangura i kon bo por eliminá lugá di brui di sangura, bo ta haña riba wèpsait di Entidat Públiko Boneiru: www.bonairegov.com/pa/sangura.