Kolegio Ehekutivo a tuma un desishon pa en general pèrmití importashon di merkansia for di Venezuela sin limitashon. Diputado Jolinda Craane, enkargá ku asuntunan ekonómiko, ta hopi kontentu ku esaki. "E reapertura di frontera marítimo ku Venezuela ta un paso importante pa abitantenan i bida empresarial di Boneiru. E ekspanshon aktual di e variedat di produktonan ku nos por importá ta nifiká mas oferta ku preisnan mas abou, un sosten pa forsa di kompra di e konsumidó i mas oportunidat pa komersiantenan i importadónan lokal."
Ta keda algun eksepshon aplikabel sí, pa evitá riesgo pa salubridat públiko i naturalesa.Te ainda no ta pèrmití pa importá bestia bibu, karni, loke sobra ora mata bestia i ku por kome, lechi, webu i otro produktonan di bestia, debí na e peliger pa grip di para i e efektonan riba nos salú. No por importá piská, otro bestia di laman (manera kref, karkó, koncha i kiwa), molusko (manera sekat) i otro invertebradonan tampoko, a ménos ku tin kestion di un empresa, kaminda e boto ta registrá na Boneiru i ku ta den poseshon di e pèrmitnan korekto. Ku esaki ta salbaguardiá e posishon di kompetensia pa piskadónan lokal. Relashoná ku temporada di parmentu di kref, bou di ningun kondishon no por trese kref fresku Boneiru entre 1 di mei i 31 di òktober.
Mata i flor bibu tampoko no ta pèrmití, pa motibu di riesgonan relashoná ku naturalesa i asuntunan veterinario. Esaki no ta konta pa speserei seku, zeta vegetal i suku. Te ainda un prohibishon di importashon pa hariña, simia i mata pa uso den empresa ta na vigor i tambe pa remedi, yerba seku i produktonan vegetal, por ehèmpel pa uso artesanal, pa motibu di presensia di brote di malesa di boka i pata na hopi empresa agríkola. Blachi di banana prosesá i empaketá pa ayaka sinembargo sí ta bon biní.
No ta pèrmití produkto di bestia, manera lana i kueru no prosesá. Meskos ta konta pa plèstik desechabel, oro, koper, nikel i sierto mata i bestia ku CITES ta protehá. Arma, munishon, remedi i droga tampoko no ta pèrmití konforme Lei di Opio di 1960 BES i kombustibel pa importashon òf benta.
Den kaso ku importá kuminda òf produktonan alimentisio, esakinan tin ku kumpli ku e eksigensianan di siguridat. Otro produktonan mester ta nobo i nunka usá i na momentu di importashon di vehíkulo i bienes registrá, manera por ehèmpel boto, mester proba ku esaki ta propiedat. No keda sin tuma kontakto ku Kuerpo di Duana Hulanda Karibense si bo tin pregunta òf duda. “Dentro di poko Kolegio Ehekutivo ta spera di por anunsiá institushon di un merkado di fruta i bèrdura pa asina duna oido na deseo di abitantenan di Boneiru”, diputado Craane a finalisá bisando.
Bo tin pregunta òf duda tokante e instrukshonnan pa importashon?
No keda sin tuma kontakto ku Kuerpo di Duana Hulanda Karibense via douane@belastingdienst-cn.nl.
