Kralendijk - E último tres simannan 379 habitante di bario a pasa nan promé angua kontra corona sin sita den sentronan di bario. Departamento di Salubridat Públiko a bini ku #BANBAKUNÁDENBOBARIO pa hasi pasamentu di angua kontra corona mas fásil posibel pa nos habitantenan di bario. Ku ayudo di Krus Korá habitantenan di bario a pasa angua den Amboina, Antriol, Nort’i Saliña, Rincon i Tera Kòrá. Den e siman di 24 di mei habitantenan di bario por pasa nan di dos angua kontra corona den e mesun barionan.
Tabatin diferente kos di grasia pa e habitantenan di bario ku a bai pasa angua. Na Antriol e habitantenan di bario despues di a pasa angua a haña un tapapoka ku e inskripshon ‘Much’i Antriol’. Fundashon Antriol Avanti a pone e tapabokanan disponibel. Den tur bario e habitantenan ku a pasa angua por a saka potret ku un leshi di #BANBAKUNA. Hopi habitante a hasi esaki.
Pa haña vírùs di corona bou di kontròl ta importante ku 85% di hende den edat di 18 aña bai ariba a pasa angua. Ta trata di 18.944 habitante fiho i temporal. Ta kalkulá e kantidat di habitante temporal na 1.500 hende. Awor akí en total 68% di e 18.944 hendenan a pasa nan promé angua.
Den e simannan binidero suidadanonan por pasa nan promé angua kontra corona na Kompleho Deportivo Jorge Nicolaas ku òf sin sita. Riba página di Facebook di Entidat Públiko Boneiru tin un bista general di e orario di pasa angua na e kompleho deportivo.
