100% di empleadonan di DTH enkargá ku mantenshon di lei ta logra e módulo di BAVPOL i ta fortifiká supervishon na Boneiru

Algun empleado di Direktorado di Supervishon i Mantenshon di Lei (DTH), ku ta enkargá ku mantenshon di lei, aktualmente ta siguiendo e kapasitashon Siguridat Públiko Boneiru (Openbare Veiligheid Bonaire – OVB). Un parti di e kapasitashon akí ta e módulo BAVPOL (Buitengewoon Agent van Politie – Polis èkstraordinario) ku ta enfoká riba mantenshon di òrden públiko i oumento di siguridat den nos komunidat. Tur e empleadonan di DTH ku ta enkargá ku mantenshon di lei a slag eksitosamente pa e módulo akí.

Ku e resultado akí Direktorado di Supervishon i Mantenshon di Lei ta pone un paso importante den fortifikashon i profeshonalisashon mas aleu di e empleadonan ku ta enkargá ku mantenshon di lei i supervishon.

E kapasitashon a kuminsá na luna di yanüari. Durante un periodo intensivo e partisipantenan a sigui treinen tokante entre otro supervishon, mantenshon di lei i òrden públiko. Despues di a finalisá tur parti eksitosamente, tur e partisipantenan a logra e módulo. Ku e kapasitashon akí Boneiru ta haña un grupo adishonal di empleado enkargá ku mantenshon di lei, ku por kontribuí na un komunidat seif i habitabel.

Sherman Blanken, hefe di departamento di Proyekto i Taskforce, ta orguyoso ku e resultado akí: ‘Mi ta orguyoso di e grupo di kolega akí ku durante e último lunanan a dediká nan mes kompletamente na e kapasitashon akí. Ku e sertifikashon akí, awor akí nos tin un grupo mas grandi di empleado enkargá ku mantenshon di lei ku ta mihó prepará pa huntu tene supervishon i traha pa logra un komunidat seif.’

Direktorado di Supervishon i Mantenshon di Lei ta sigui invertí den desaroyo i profeshonalisashon di su empleadonan enkargá ku mantenshon di lei i supervishon. Pa medio di sigui invertí den kapasitashon i treinen, e direktorado ta traha na un manera desidido i efisiente riba supervishon hustu i un komunidat seif pa Boneiru.