Preguntanan hopi hasí tokante dengue, zika i chikungunya

Dengue ta un infekshon ku bo ta haña despues di un piká di e sangura di dengue (Aedes aegypti). Dengue no ta pasa di hende pa hende.

Mayoria biaha ora bo tin dengue, no tin síntoma. Si bo tin síntoma, nan ta parse hopi síntomanan di grip: kentura i/òf kalafriu, doló di kabes (doló tras di wowo), doló di djòint i múskulo, rebultashon, walmentu di stoma i sakamentu.
Masha poko biaha e malesa ta muchu mas grave. Bo por haña e ora ei sangramentu di nanishi, òf karni di djente ku ta sangra. Òf por sali mancha püs kòrá riba kueru. Si tin e síntomanan aki, ta importante pa tuma kontakto ku bo dòkter di kas.

Despues di 1 pa 2 siman e kehonan a disparsé.

Un gran parti di hende ku haña zika no tin keho. Un promedio di 1 di kada 5 hende ta haña keho:

• Kentura diripiente
• Inflamashon di wowo
• Doló di múskulo i skarnir, spesialmente na man i na pia
• Rebultashon di kueru, hopi biaha na bo kara promé
• Tin ora: doló di kabes, no tin gana di kome, sakamentu, diarea i doló di barika

Despues di maksimalmente 1 siman e kehonan a disparsé

Chikungunya den mayoria kaso ta duna keho:

• Kentura haltu diripiente
• Doló fuerte di skarnir
• Doló di kabes
• Doló di múskulo
• Rebultashon di kueru (ku pèshi kòrá)
• Problema ku wowo

Despues di 1 pa 3 siman e kehonan a disparsé, pero e doló di múskulo por dura vários luna te vários aña.

Wak pa e sangura di dengue no por pika bo. Si e pika bo miéntras e sangura tin e vírùs di dengue, bo ta haña dengue. E sangura di dengue spesialmente ta aktivo mainta tempran i atardi lat. Esakinan bo por hasi pa protehá bo mes kontra piká di sangura:  

• Usa un sprei/lotion ku por lo ménos 30% DEET aden.
• Wak pa bo kas no tin sangura aden, tene bentana i porta será, usa skrin kontra sangura.
• Drumi den dia i anochi bou di un mosketero.
• Bisti paña koló kla, karson largu, manga largu, mea i sapatu será.

Si bo tin dengue, ta importante pa protehá bo mes kontra piká nobo di sangura. Asina bo ta evitá ku e sangura ta bolbe pika bo, i via bo e ora ei ta pasa e vírùs pa otro hende.

E ora ei ta konsehabel pa tuma kontakto ku bo dòkter di kas. E dòkter di kas por evaluá e ora ei si mester hasi mas investigashon di dengue. 

Mayoria biaha dengue ta pasa di su mes. No tin remedi pa kura dengue. Pa kentura i doló, bo por usa paracetamol pa aliviá síntoma. Pa doló i kentura no usa aspirin, diclofenac, voltaren, ibuprofen òf naproxen.

Bebe sufisiente awa. Pa prevení deshidratashon, bo por disolvé saku ku ORS (Oral Rehydration Salt) den awa herebé ku a fria. Regularmente bebe un poko di esaki. Si tòg bo bira mas malu, tuma kontakto ku bo dòkter di kas.

Laboratorio ta informá departamento di Salubridat Públiko ku bo a tèst positivo pa dengue. Despues departamento di Salubridat Públiko ta tuma kontakto ku bo pa traha un sita pa un bishita na kas. Durante e bishita, un empleado di e departamento ta kontrolá si tin kriadero di sangura rònt di kas. Si haña kriadero, ta eliminá òf trata nan.

Si bo a hasi tèst i e tèst ta mustra ku bo tin dengue, bo dòkter di kas ta mèldu esei na departamento di Salubridat Públiko. E intenshon ta ku departamento di Salubridat Públiko ta tuma kontakto ku bo pa traha un sita pa un bishita na kas. Por sosodé ku e departamento no a tuma kontakto ku bo ainda. E ora ei, por fabor, bo mes tuma kontakto ku nan via 715 5324.

Dengue nos ta topa kuné tur kaminda na mundu, prinsipalmente den trópiko i suptrópiko. Na Boneiru kasi tur aña tin un par di kaso di dengue. Na aña 2012 tabata último biaha ku tabatin masha hopi kaso mes di dengue na Boneiru. Aña pasá i e aña akí na kasi tur pais na Latinoamérika tabatin hopi kaso di dengue. Chèns ta grandi ku e dengue ku nos tin awor akí na nos isla, a bini for di Latinoamérika.

Wer tambe ta hunga un ròl. Tanten ku áwaseru sigui kai, e sangura di dengue por pone webu den awa ku ta para ketu, ku despues ta sali. I tanten ku sangura di dengue i e vírùs di dengue ta presente, e sanguranan por pasa e malesa pa hende.

Sí, bo por bolbe haña dengue, pero e ora ei un otro variante di dje. Tin kuater variante di dengue. Si bo haña dengue pa di dos biaha, tin un chèns chikitu ku bo ta bira mas malu.

Si bo tin dengue i e sangura di dengue ta bolbe pika bo, bo por pasa e vírùs di dengue pa e sangura. E sangura e ora ei por infektá otro hende. For di e momentu ku bo tin síntoma ku ta parse dengue, mas o ménos te maksimalmente 12 dia, bo por transmití e vírùs pa e sangura. Hasta si bo tin dengue sin síntoma, ketu bai bo por transmití e vírùs pa e sangura. P’esei protehá bo mes bon kontra piká di sangura, asina bo ta evitá ku otro ta haña dengue.

Si un sangura di dengue pika bo, despues e por pika bo kompañeronan di kas i asina pasa e malesa. P’esei ta importante pa tur hende protehá nan mes kontra piká di sangura.

Sí, esei por. Dengue no ta pasa di hende pa hende. Sangura ta pasa e malesa. P’esei ta importante ku abo i bo bishitantenan ta protehá boso mes bon kontra piká di sangura. E mihó kos ta pa risibí bishita paden di kas i pèrkurá ku no tin sangura den kas.

Dengue no ta kontagioso di hende pa hende. Bo yu ta sinti su mes bon? E ora ei e por bai krèsh, akohida, skol sin problema. Un adulto ku dengue ku ta sinti su mes bon, por traha sin problema. Ta importante sí pa protehá bo mes bon kontra piká di sangura.

Ta usa e bakuna awor aki ainda solamente pa biaheronan pa un lugá kaminda tin hopi dengue.  Un hende ta haña dos angua kontra dengue, despues di tres luna e persona ei ta protehá. Bo no por pasa e anguanan ei si ménos ku un aña pasá bo a haña dengue. No ta kla ainda durante kuantu tempu e anguanan di dengue ta duna protekshon kontra dengue. P’esei Organisashon Mundial di Salubridat ta konsehá pa ainda no pasa hopi hende e angua di dengue.

Sangura ta sinti nan mes bon ora nan ta serka di hende, pensa riba siudat, bario. Sangura ta pone webu den baki di awa na kas. I tambe den opheto ku awa rònt di kas manera bòter bashí, baki di kuminda, tayer.
E webunan ta sali ora sangura bin den kontakto ku awa. E webunan ta keda bon den kondishonnan hopi seku, nan por sobrebibí pa lunanan largu. Sanguranan hembra ta pone entre algun dies i algun shen webu te 5 biaha den nan bida. E sangura di dengue no ta pone su webunan den plas di awa i dam.
Sanguranan adulto ta sosegá den kas na lugánan skur, den kashi, bou di kama, tras di kortina. Ei nan ta protehá kontra bientu, áwaseru i mayoria animal yagdó. Asina nan por biba mas largu i oumentá e chèns pa biba sufisientemente largu pa tuma e vírùs di un persona i pasa esaki pa un otro.

E sangura di dengue ta biba den besindario di hende i ta pone su webunan den awa limpi ku ta keda para den opheto ku hende a traha. Minimalmente un biaha pa siman, kana rònt den bo kurá di kas i buska posibel opheto den kua awa por keda para. Tuma e medida akí semanalmente pa evitá ku sangura por brui: 

• Eliminá tur opheto ku tin awa aden òf ku por kohe awa. Bo no por warda e ophetonan ei? Bòltu nan òf semanalmente e ora ei, pasa e banda gròf di un spòns na e bandanan lizu pa kita webu. E webunan ta hopi chikitu i ta manera punta pretu.
• Bo tin barí òf baki pa kohe kohe awa pa mata òf bestia? Sera esakinan bon pa sangura. Esaki por, por ehèmpel, ku un paña òf skrin kontra sangura ku un faha di elastik ku ta span rònt di esaki. Den un tempu hopi kòrtiku barí i baki ku áwaseru por produsí míles di sangura. P’esei yama e departamento di Salubridat Públiko na e number 715-5324 pa konseho.

No tin masha sentido pa spùit den bario kontra sangura. Si bo hasi esei, ta mata solamente un parti chikitu di sangura. Spùitmentu no tin efekto riba kriadero ku webu, sangura ta sigui pone webu. E venenu ku ta spùit kuné, no solamente ta mata sangura adulto, sino tambe otro insekto i bestia. E ta hasi daño tambe na hende. P’esei e departamento di Salubridat Públiko ta sigui konseho di Organisashon Mundial di Salu, WHO. E konseho ta pa no spùit den bario sin mas. For di investigashon di último añanan ta resultá ku spùitmentu no ta yuda pa evitá ku kasonan di dengue, òf redusí un epidemia di dengue.

Na e departamento di Salubridat Públiko tin empleado ku ta enkargá ku eliminashon di kriadero di bestianan ku ta transmití malesa. E empleadonan akí ta traha na e departamentu di Kontròl di Vèktòr. Nan ta kontrolá henter aña na adrèsnan i kaminda ta kohe áwaseru den barí òf rembak.  Nan ta trata e awa ku medionan biológiko spesial. E empleadonan ta kontrolá tambe si den bario tin kriadero. Hopi biaha nan ta pasa tambe na lugánan kaminda hende ku problema ku salú ta biba òf lugánan kaminda hopi hende ta bini huntu. 

Dòkternan di kas i laboratorio ta informá e departamento di kasonan di dengue. Despues di esaki, e departamento di Salubridat Públiko ta tuma kontakto ku e persona ku tin dengue. E persona akí ta haña tep i konseho di e departamento. Despues un inspektor di Kontròl di Vèktòr ta bai hasi un bishita serka e persona ku dengue. E inspektor ta kontrolá si na kas òf den besindario di e persona malu tin kriadero di e sangura di dengue. Si ta asina, ta eliminá òf trata e kriaderonan.

Bo mester di konseho òf yudansa pa awa den barí òf rembak? Òf bo tin hopi molèster di hopi sangura? Yama e ora ei e departamento di Salubridat Públiko na number 715-5324.