Purpose of this campaign
Uso di alkohòl bou di hóben na Boneiru
Na Boneiru tambe tin uso di alkohòl bou di hóben. For di Enkuesta Global di Salú na Skol (2023) ta resultá ku:
- mas o ménos un tersera parti di hóbennan a bebe alkohòl e último luna;
- 15% di hóbennan na edat di 12 aña òf mas yòn a bebe alkohòl;
- mas o ménos 60% di hóbennan te ku 17 aña a yega di bebe alkohòl;
- mas o ménos 20% di hóbennan tabata burachi sierto momentu.
Hóbennan ta indiká ku hopi biaha nan mes ta kumpra alkohòl den pakus òf ta haña esaki di famia òf konosí.
Dikon no usa alkohòl bou di 18 aña?
Serebro di hóben ta den desaroyo ainda. Te banda di 25 aña di edat numa, serebronan a desaroyá kompletamente. Alkohòl por stroba un desaroyo normal.
Si hóbennan bebe hopi alkohòl hopi biaha, nan serebro por sufri daño. Por ehèmpel esaki por afektá nan abilidat pa konsentrá i funshoná na skol òf trabou.
Uso di alkohòl por afektá tambe otro órganonan den nan kresementu. Spesialmente higra, ku ta desintegrá e parti mas grandi di alkohòl, por sufri daño.
Tur hende tin un ròl
Hóbennan mes por hunga un ròl hasiendo eskoho konsiente i papia ku otro tokante alkohòl. Pero Nothing Nada Nix18 no ta dirigí solamente riba nan.
Mayor, miembronan di famia, skol, organisashon i otro adulto tambe tin un ròl importante. Dunando e bon ehèmpel i papia ku hóbennan tokante alkohòl, adultonan por yuda hóbennan hasi eskoho saludabel.
Bou di 18? Nothing. Nada. Nix.
Keda sin bebe alkohòl promé ku hasi 18 aña, hóbennan ta haña e mihó chèns pa krese salú i desaroyá bon.
P’esei GGD Bonaire / Salubridat Públiko ta konsehá: nada di alkohòl bou di 18 aña. Despues tambe ta konta: ménos alkohòl, mihó pa bo salú.
Huntu e mesun mensahe
Nothing Nada Nix18 ta adaptashon pa Karibe di e kampaña di NIX18. A hinka e kampaña den otro ku aporte di islanan den Karibe i ta implementá esaki na Boneiru, Sint-Eustatius, Saba, Aruba, Kòrsou i Sint-Maarten.
Pregunta?
Bo tin pregunta tokante uso di alkohòl serka hóben òf bo ke mas informashon? Tuma kontakto e ora ei ku GGD Bonaire via +599 715 5330.
Orario
Djaluna t/k djaweps: 07.30–12.00 i 13.30–17.00.