Dekreto di Gezaghèber di Boneiru (23 aprel 2021) Lesa mas tokante di e pandemia COVID-19

 

Transporte Públiko

Transporte Públiko na Boneiru

Ta otorgá pèrmit di taksi i outobùs pa un periodo di maksimalmente 5 aña na personanan natural ku ta establesé na Boneiru. Banda di esei e shofùrnan mester tin un pèrmit pa kore taksi òf outobùs ku e Hefe Lokal di Polis ta duna. Ta otorgá un pèrmit pa kore taksi òf outobùs solamente na personanan ku ta den poseshon di un reibeweis bálido, ku tin 25 aña òf mas i ku ta di ‘bon komportashon moral i sosial’. Shofùrnan di 60 aña bai ariba tur aña mester pasa tèst médiko.

For di e Ordenansanan Insular vigente ta resultá ku e trabou komo shofùr mester ta un aktividat prinsipal. Esaki ta nifiká ku kore un taksi òf outobùs mester ta e fuente mas importante di entrada pa e shofùr, pues no un aktividat sekundario.

E maneho relashoná ku transporte di persona den outobùs ta basá riba e Ordenansa Insular ‘Autobusdiensten Bonaire – Servisio di outobùs Boneiru’ di 1961. E Ordenansa Insular ‘Huurautodiensten Bonaire – Servisio di outo di hür Boneiru’ ku ta regulá transporte pa medio di taksi ta data di 1962.

Ta nenga òf hala un pèrmit aden ora ku e persona ku a hasi petishon òf e persona ku tin un pèrmit ya kaba na un otro manera por sòru sufisientemente pa su propio mantenshon. Den ‘operashon di su servisio’ e persona ku tin un pèrmit por laga un shofùr dun’é asistensia. E shofùr ousiliar aki tambe mester disponé di un pèrmit pa kore taksi òf outobùs.

Transporte públiko ta transporte kolektivo, transporte pa medio di taksi ta transporte individual / di grupo. Na Boneiru transporte públiko ta na enkargo di shofùrnan di outobùs, miéntras, e shofùrnan di taksi ta enkargá nan mes ku transporte pa medio di taksi.

Un petishon pa pèrmit pa servisio di outobùs i di taksi ta sosodé por eskrito na Kolegio Ehekutivo i ta kontené por lo ménos e siguiente informashonnan: fam, nòmbernan djadilanti, fecha di nasementu, lugá di nasementu, adrès i nashonalidat di e persona ku a hasi petishon.