Sali i yega Seif
Salú i kuida bo mes bon ta importante na Boneiru, ora di salimentu i ora ku tin evento tambe. Den e siguiente teksto bo ta haña algun tep simpel pa keda salú i seif. Ta trata di salú seksual, kalor, protekshon di oido i konsumo moderá di alkohòl.
Salú seksual
Seksualidat ta un parti normal i importante di bida. E ta mas ku solamente sèks. Seksualidat ta bai tokante kon hende ta sinti i komportá nan mes.
Por ehèmpel tokante stimashon, forsa di atrakshon i nan kurpa. Informashon bon i klarito ta yuda bo hasi eskoho konsiente.
Asina bo por kuida bo mes i kuida otronan bon. Bo ke eksperensiá seksualidat na un manera seif, dushi i relahá?
E ora ei a base di Sali Seif bo por pensa riba lo siguiente:
- Tene kuenta ku bo propio límitenan i ku deseonan di e otro persona
Tur hende tin otro límite i deseo, prinsipalmente ora ta trata di seksualidat.
Pensa bon tokante kiko bo ke, kiko bo ta gusta i na unda bo límite ta.
Respetá límite i deseo di e otro persona tambe. Esaki ta konta pa komportashon seksual online tambe.
- Bo ke sa mas tokante límite i deseo? E ora ei bishitá e wèpsait akí.
- Usa un kondon
Ku un kondon bo tin sèks dushi i seif.
Bo no tin strès tokante soa (un infekshon ku bo por haña debí na sèks ku no ta seif), i tampoko tokante un embaraso ku bo no ke.
Bo por kumpra kondon na farmasia òf na e mashinnan di kondon na nos isla.
Tin kondon di bon kalidat i pagabel for di $ 0,50 pa unu na diferente sitio anónimo.
- Bo ke sa na unda bo por haña nan? E ora ei wak e sitionan akinan. Sea prepará i kumpra nan.
- Laga nan tèst bo grátis i na un manera anónimo pa wak si bo tin un soa, i haña tratamentu si esaki ta nesesario
Un soa ta un infekshon ku bo por haña pa medio di sèks. Tin ora bo no ta ripará nada, òf ta te despues bo ta haña keho.
Tòg bo por kontagiá otro hende i e por ta malu pa bo salú. Pa e motibu akí bo tin ku usa un kondon durante sèks.
Bai hasi tèst ora bo tin keho òf ora bo ta kere ku bo tin un soa.
Bo por hasi esaki serka bo dòkter di kas òf na e ora di konsulta di Salú Seksual di GGD Boneiru / Salubridat Públiko. Hasi tèst ta anónimo i grátis.
- Pa konseho òf pa un sita, yama òf manda un Whatsapp na 7907373.
- Bai e ora di konsulta si bo tin pregunta òf si bo ke papia
E ora di konsulta di Salú Seksual di GGD Boneiru / Salubridat Públiko t’ei pa tur hende.
Einan den un forma grátis i anónimo bo por hasi bo preguntanan òf papia ku un hende.
Por ehèmpel tokante bo kurpa, relashon, stimashon, sèks òf antikonsepshon.
Bo por papia tambe tokante sierto situashonnan ku bo no a gusta.
- Pa konseho òf pa un sita, yama òf manda un Whatsapp na 7907373.
Protekshon kontra kalor
Debí na kambio di klima kada biaha ta bira mas kalor na Boneiru. Tambe mas tantu biaha tin dia ku kalor ekstremo.
Kalor por tin influensia riba bo salú. Por ehèmpel bo por haña molèster di deshidratashon, biramentu di kabes i kansansio.
Pa e motibu akí ta importante pa paga tinu èkstra, prinsipalmente durante eventonan na aire liber.
Asina ‘ki bo ta protehá bo mes:
- Evitá e oranan di mas kalor di dia
Keda entre 11:00 or i 15:00 or mas tantu posibel for di den solo. - Tene bo mes fresku
Keda mas tantu posibel den sombra.
Usa por ehèmpel un pèchi, un brel di solo i/òf un wairu.
- Bebe sufisiente
Bebe regularmente, tambe ora bo no tin set.
Skohe prinsipalmente awa i bebe ménos alkohòl.
- Kuida otro
Paga tinu èkstra pa hende ku ta vulnerabel, manera mucha yòn, hende grandi i hende ku tin un malesa króniko.
Protekshon di oido
Músika ta parti di nos kultura.
Durante eventonan manera Karnaval, Dia di Rincon i Regata hopi biaha e zonido ta duru.
Zonido duru por ta malu pa bo oido.
P’esei:
- Protehá bo oido ora tin músika duru
Usa protekshon pa oido, manera dòpi pa orea.
Esaki ta prinsipalmente importante ora bo ta para pegá ku e spikernan. - Paga tinu riba mucha
Nan orea ta mas sensibel.
Sòru pa nan no para muchu pegá ku e spikernan i duna nan protekshon di oído.
