Trayekto di Patrimonio Mundial
Resúmen di desaroyo di e trayekto di Patrimonio Mundial – Fondonan di Naturalesa Hulanda Karibense
Riba proposishon di Entidat Públiko Boneiru na aña 2010 a selektá i inkluí Parke Supmarino Boneiru (Bonaire National Marine Park) riba e lista provishonal di patrimonionan mundial hulandes. E tempu ei gobièrnu di Reino a indiká di tin intenshon pa den periodo di 2011 te ku 2025 huntu ku Entidat Públiko Boneiru i STINAPA, gerente di e parke supmarino, kuminsá ku e preparashonnan pa proponé e área nominá pa atmishon riba e Lista di Patrimonio Mundial UNESCO.
Evaluashon – promé fase
Na fin di aña 2014 Boneiru a entregá un promé fail di faktibilidat na ministerio di Enseñansa, Kultura i Siensia pa nominashon di Parke Marino di Boneiru komo patrimonio mundial. E tempu ei a trata partikularmente di un evaluashon di parti di Reino ku ta konserní e posibilidatnan pa ser inskribí riba e Lista di Patrimonio Mundial mediante e komishon di Patrimonio Mundial. Na aña 2015 un grupo di eksperto (grupo di eksperto evaluashon nominashon pa patrimonio mundial) a evaluá e fail aki. E grupo di eksperto tabata di opinion ku tin sufisiente argumento pa proba e balor universal eksepshonal di Bonaire National Marine Park (BNMP), pero ku tin mester di mas tempu pa argumentá e balor universal eksepshonal aki na un manera konvinsente. E minister a tuma e konseho aki over i a indiká ku e ke laga evaluá argumentashon di e balor universal eksepshonal di Bonaire National Marine Park di nobo.
Proposishon di proyekto – di dos fase
Entidat Públiko Boneiru a bai di akuerdo ku esaki i Direktorado di Planifikashon i Desaroyo a bai prosesá e fail mas aleu ku un kònsùltent eksterno, i despues di esaki a entregá un proposishon di proyekto pa ehekushon di e di dos fase di e trayekto. Na aña 2016 a hasi palabrashonnan mas aleu tokante e argumentashon i e manera di evaluashon. Banda di esei Entidat Públiko Boneiru, riba konseho di e grupo di eksperto i e grupo di direkshon di WHN, a bai di akuerdo pa investigá e faktibilidat di un nominashon di un área di laman ku ta pasa frontera ku mas isla i pais. Esaki a base di konseho di konseheronan di Patrimonio Mundial pa hasi e chèns pa logra mas grandi.
Na kuminsamentu di aña 2018 a entregá un rapòrt na ministerio di Agrikultura, Naturalesa i Kalidat di Kuminda. E grupo di eksperto a evaluá e rapòrt un biaha mas. Seguidamente e grupo di eksperto a konsehá ku e fail no ta sufisiente hechu pa un posibel nominashon. Esaki mirando e aspektonan relashoná ku insufisiente superfisie di parke marino ku ta pasa frontera i institushon di áreanan di bùfer tera i laman. Konseho di e grupo aki ta pa den promé instante traha riba un asina yamá ‘Man and Biosphere site’ i posibelmente den futuro bai over na un nominashon pa Patrimonio. Na luna di mei 2019 Ministerio di Agrikultura, Naturalesa i Kalidat di Kuminda a tuma e konseho aki over.
Futuro – di tres fase
Meimei di aña 2019 un kònsùltent a formulá konsepto di un proposishon pa fase 3. Aktividatnan den e ‘di tres fase’ aki ta enserá prinsipalmente evaluashon di maneho di den futuro, investigashon adishonal, sosten polítiko i públiko etc. Sinembargo no a sobra sufisiente tempu bou di e régimen di fondonan di naturalesa pa formalmente drenta e siguiente fase.
Na aña 2020 Komishon di Patrimonio Mundial Boneiru lo duna konseho na Kolegio Ehekutivo pa loke ta trata e progreso. Si tin lus bèrdè pa sigui traha riba e fail, e ora ei lo por stipulá un aña di nominashon tambe. E ora ei den e siguiente fase lo hasi un investigashon ekonómiko/finansiero i un evaluashon. Tambe lo hasi investigashon i evaluashon mas aleu di e kuadro legal, delimitashonnan, maneho, palabrashonnan gubernamental, komunikashon i informashon. En breve, ainda tin hopi trabou pa hasi promé ku por entregá un fail kompletamente akabá.
