Naturalisashon
Pa bira suidadano hulandes pa medio di naturalisashon bo tin ku demostrá ku bo tin sufisiente konosementu di idioma papiamentu i hulandes, di e sistema di biba i traha na Boneiru i di e struktura estatal di Reino Hulandes, di Hulanda Karibense i di Boneiru. Pa esaki bo tin ku hasi un prueba di naturalisashon.
E prueba di naturalisashon ta konsistí di tres parti:
- Parti 1: konosementu di komunidat i konosementu di struktura estatal
- Parti 2: dominio di papiamentu: lesa, skirbi, skucha i papia
- Parti 3: dominio di hulandes: lesa, skirbi, skucha i papia
Bo mester a pasa kada prueba ku bon resultado pa finalmente bo optené e Sertifikado Prueba di Naturalisashon.
Gezaghèber ta e outoridat kompetente pa laga hasi e prueba di naturalisashon. Gabinete di Gezaghèber ta sostené Gezaghèber den esaki.
Dos biaha pa aña ta organisá e prueba di naturalisashon. Pa por partisipá na e pruebanan bo tin ku registrá na Gabinete di Gezaghèber.
Bo ta registrá bo mes pa e prueba di naturalisashon kompletu òf pa un parti di esaki pa medio di yena e formulario di registrashon pa prueba di naturalisashon.
Por haña e formulario di registrashon na Ofisina Prinsipal di Gobernashon tambe.
Promé ku bo entregá e formulario, bo mester a paga e suma di sen di eksámen ku bo tin ku paga.
Seremonia di Naturalisashon
Un seremonia di naturalisashon ta un seremonia pa hendenan ku ke bira suidadano hulandes pa medio di naturalisashon òf pa medio di e prosedura di opshon. E seremonia di naturalisashon ta e último parti pa optené nashonalidat hulandes. Tur hende for di 16 aña ku ke bira suidadano hulandes, ta obligá pa partisipá na e seremonia.
Gabinete di Gezaghèber ta organisá e seremonia di naturalisashon. E seremonia di naturalisashon ta tuma lugá 3 biaha pa aña, den luna di aprel, ougùstùs i desèmber.
