Punto di informashon tokante medio ambiente

Pa protehá nos medio ambiente i nos ambiente di biba mas tantu posibel, a formulá vários regla di medio ambiente. E reglanan akí ta den e Dekreto di Establesimentu i Aktividat BES (Inrichtingen- en Activiteitenbesluit BES - IAB BES) i nan ta aplikabel pa empresanan ku ta aktivo na Boneiru, Sint Eustatius i Saba. For di 1 di aprel 2024 empresanan na Boneiru, Sint Eustatius i Saba mester tene nan mes na e reglanan nobo di medio ambiente akí.

E Punto di Informashon Medio Ambiente ta yuda empresanan ku e reglanan akí. Nan ta duna e empresanan informashon simpel i práktiko tokante e reglanan di medio ambiente. Por ehèmpel kua ta e reglanan ku ta konta pa tur empresa i ki ora nan tin ku mèldu algu. E Punto di Informashon Medio Ambiente ta informá empresanan tambe den kua kaso nan tin mester di un pèrmit di medio ambiente i na kua instansia nan por hasi petishon pa esaki.

Tur informashon tokante e Dekreto di Establesimentu i Aktividat BES ta disponibel riba e wèpsait: www.infomilcn.com. Einan rápidamente bo por haña kontesta riba bo preguntanan. Bo ta preferá kontakto personal? E ora ei riba dianan di trabou entre 08.00 or i 12.00 or bo por bishitá bali di e Punto di Informashon Medio Ambiente den ofisina di Kámara di Komèrsio Boneiru.