Eroshon

Bestia ku ta kana lòs, desaroyo di kosta sin kontròl, i maneho malu di awaseru ta forma e kousanan mas prinsipal di eroshon i awa ku ta kore bai sin kontròl. Huntu ku aktividatnan di konstrukshon esaki ta un di e kousanan mas importante di kalidat malu di awa. 

Bestia

Mediante invershon den krio di bestia profeshonal (inkluso matadero ku ta funshoná), den tenementu di bestia tras di trankera i den eliminashon di kabritu i buriku di mondi ku ta kana lòs, vegetashon por rekuperá su mes di manera ku suela ta stabilisá su mes i por tene awa mas mihó. Aktualmente ta entamando e aktividatnan aki den forma di diferente proyekto den koperashon ku ministerio di Agrikultura, Naturalesa i Kalidat di Kuminda i komunidat lokal i kunukeronan. Espektativa ta ku mas òf ménos na aña 2024 e mataderonan ta disponé di sufisiente kapasidat i ku tur empresa di krio di bestia ku ta operashonal tin un trankera rònt di nan. E aspirashon ta pa na aña 2030 a saka tur kabritu i buriku di mondi for di den naturalesa.