Shushi

Maneho di shushi

Pa redusí e konsekuensianan di eliminashon di shushi sólido, mas òf ménos na aña 2024 strategianan efektivo pa tratamentu di shushi lo ta desaroyá, di manera ku lo redusí dùmpmentu mas tantu posibel. Por ehèmpel lo invertí den prosesamentu i resiklahe avansá di shushi, pa na aña 2030 no tin mester di dùmp mayoria di e fluhonan di shushi mas. Kaminda prosesamentu lokal di shushi no ta posibel, lo transportá esaki konforme tur regla i norma internashonal pa prosesamentu den otro pais.

Redusí

Kaminda ta posibel e punto di salida ta pa produsí ménos shushi posibel. Un di e metanan ta prohibishon di plèstik ku ta usa un biaha so (Single Use Plastics - SUPs). Den fase lo prohibí artíkulonan desechabel di plèstik. Na aña 2018 Konseho Insular a entregá un moshon pa prohibishon di plèstik ku ta usa un biaha so (SUPs) i na aña 2019 Entidat Públiko Boneiru i ministerio di Infrastruktura i Maneho di Awa a firma un deklarashon di intenshon pa realisá e prohibishon aki i di e manera aki minimalisá shushi tirá riba kaya i den naturalesa i limitá e konsekuensianan negativo di esaki riba medio ambiente. Na luna di desèmber 2020 lo kuminsá ku komunikashon tokante e promé fase di e prohibishon. Ta realisá e proyekto den koperashon ku Fondo Mundial di Naturalesa. Tene nos wèpsait i facebook na bista pa e último desaroyonan.

Reusá

Un parti di redukshon di nos shushi (di plèstik) ta relashoná ku konsientisashon. Pa engrandesé e konsientisashon aki, den e periodo di 2020 – 2022 lo bini ku un kampaña di komunikashon i lo pone esaki den práktika. Meta di e kampaña ta dòbel: konsientisá usuarionan di e impakto di nan komportashon di konsumidó riba medio ambiente i nos bunita naturalesa i, pa loke ta trata e ehèmpel di plèstik, enkurashá uso di alternativanan reusabel i no-tóksiko. Den e kuadro aki Entidat Públiko Boneiru ta investigá e posibilidat pa kaminda ta posibel stimulá i sostené inisiativanan pa por ehèmpel bini ku un asina yamá ‘kringloopwinkel’ (un tienda ku ta selektá, drecha i bende artíkulonan segunda mano) i un Repair Café.

Resiklá

Banda di Reusá, uso di nobo i resiklahe di produkto ta un punto di agènda importante. Ta stimulá empresanan pa hasi uso di plèstik i otro shushi sólido pa traha produkto nobo. Maneho di Entidat Públiko Boneiru ta enfoká riba regulashon i mantenshon di lei pa loke ta trata separashon di shushi na kasnan di famia i empresanan.

Maneho di Shushi na Midí

Maneho di Shushi na Midí ta un programa di Entidat Públiko Boneiru den koperashon ku ministerio di Infrastruktura i Maneho di Awa i e kompania ku ta rekohé shushi Selibon. Durante un periodo di 5 aña ta invertí mas òf ménos $ 10.000.000,-- den fasilidatnan pa modernisashon di rekohementu i prosesamentu di shushi na Boneiru. Aki mester pensa riba kayanan di medio ambiente i sitionan pa hiba shushi renobá, seramentu di sitionan kaminda ta dùmp shushi ilegalmente i separashon i resiklahe di fluhonan di shushi.

Pa un bista general kompleto di e metanan di maneho di shushi pa Boneiru i e plan di maneho ‘Maneho di Shushi na Midí’ bo por akudí akinan.     

Awa shushi

E último añanan Entidat Públiko Boneiru por a realisá invershonnan supstansial riba tereno di awa shushi. Ku sosten di Union Oropeo i ministerio di Infrastruktura i Maneho di Awa por ehèmpel e ret di kloaka bou di kayanan di Playa a bira realidat i e instalashon di purifikashon di awa di kloaka na Lagun t’ei pa prosesá awa shushi di tantu e kloaka komo di sobrá di fuentenan di awa shushi ku no ta konektá pa asina yega na awa  ekológikamente sano i reusabel pa irigashon. Den e añanan binidero Entidat Públiko Boneiru lo ampliá e sistema di kloaka mas aleu. E ambishon riba término largu ta pa realisá 100% di prosesamentu di awa shushi.

Pa un bista general kompleto di e metanan di awa shushi pa Boneiru bo por akudí akinan.