Próksimo legislashon

Dekreto di Institushon i Aktividat

Na mitar di 2022 e Dekreto di Institushon i Aktividat ta drenta na vigor, un sistema di regla general pa empresa. Debí na efekto di e reglanan general aki e proseduranan di pèrmit ku ta tuma hopi tempu no ta nesesario mas i hopi empresa por kuminsá mas lihé.

Banda di bentahanan atministrativo e reglanan general di e Dekreto di Institushon i Aktividat ta sòru ku tin ménos chèns pa surgi molèster pa medio ambiente ku empresanan ta okashoná, manera:  

• Polushon di suela pa motibu di falta di fasilidat ku ta protehá suela.
• Polushon pa motibu di shushi ku no ta keda almasená korektamente
• Polushon di awa na superfisie i awa den suela pa motibu di kombustibel i otro supstansia ku ta lèk.
• Molèster debí na holó stinki, stòf òf sonido pa motibu di operashon empresarial robes òf pa motibu di falta di fasilidatnan adekuá.
• Menasa pa funshonamentu di e sistema di kloaka debí na dùmpmentu (di supstansia ku ta kontené vèt).
• Falta di ‘good housekeeping’.  

Kon e Dekreto di Institushon i Aktividat ta funshoná

Pa protekshon di medio ambiente i siguridat di suidadanonan i di ambiente di biba, outoridatnan kompetente por imponé eksigensianan pa un empresa òf aktividat. Dependiente di e tipo di empresa (e kategoria ku e empresa ta kai bou di dje) a inkluí e eksigensianan aki den reglanan general òf den instrukshonnan pa pèrmit.  

E Dekreto di Institushon i Aktividat ta bai konosé 4 kategoria:

• Kategoria I: Empresanan ku ta kai bou di reglanan general pero ku no tin un obligashon di notifikashon
• Kategoria II: Empresanan ku ta kai bou di reglanan general i ku tin un obligashon di notifikashon
• Kategoria III: Empresanan ku tin un obligashon di pèrmit i ku mester pidi esaki serka Kolegio Ehekutivo
• Kategoria IV: Empresanan ku tin un obligashon di pèrmit i ku mester pidi esaki serka minister

Kategoria I, II i III ta kai bou di outoridat kompetente di Kolegio Ehekutivo.

Kategoria IV ta kai bou di outoridat kompetente di minister.

Reglanan general (pa kategoria I i II) ta reglanan ku ta aplikabel pa tur empresa ku ta ehekutá un sierto aktividat. Den e kaso ei no tin mester di un prosedura di pèrmit. E reglanan ta direktamente aplikabel. Por lo tantu e diferensia entre kategoria I i II ta solamente e obligashon di notifikashon na Kolegio Ehekutivo. Pa e kategoria mas leve (I) esaki no ta nesesario. Pa kategoria II sí esaki ta nesesario. Den e kaso aki e empresa ta notifiká na Kolegio Ehekutivo ku e ta kuminsá, kambia òf stòp ku un aktividat. E eksigensianan ku e mester kumpli kuné e ta haña den e dekreto.

E kategorianan mas pisá di empresa (III i IV) mester hasi petishon pa un pèrmit serka Kolegio Ehekutivo òf serka minister promé ku nan kuminsá ku nan operashon. Lo hinka e petishon aki den prosedura, despues di kua ta duna òf no ta duna pèrmit. E eksigensianan ku e empresa mester kumpli kuné e ora ei, e empresa ta haña den su pèrmit. Kaminda ta nesesario, pa medio di e pèrmit por deklará (algun) regla general tambe aplikabel.