Deklarashon Tokante Kondukta

Un Deklarashon Tokante Kondukta (VOG) ta un deklarashon ku ta mustra ku bo pasado (hudisial) no ta forma un opheshon pa ehersé un tarea òf funshon spesífiko den komunidat. Ora di evaluashon di un petishon pa un Deklarashon Tokante Kondukta (VOG), Gezaghèber ta wak si bo tin echonan kastigabel riba bo nòmber ku ta forma un riesgo pa e funshon òf e meta pa kua bo ta pidi e Deklarashon Tokante Kondukta (VOG). Sierto echonan kastigabel ta forma un opheshon pa sierto trabou òf stazje, pero pa otro nò. Bo no tin karchi di kastigu, òf bo no a kometé echonan kastigabel ku ta relevante pa e meta di bo petishon? E ora ei bo ta haña un  Deklarashon Tokante Kondukta (VOG).  

 

Pakiko mi mester di un Deklarashon Tokante Kondukta (VOG)?

Por pidi un Deklarashon Tokante Kondukta (VOG) den diferente kaso. Bo tin mester di un Deklarashon Tokante Kondukta (VOG) pa entre otro:

  • empleo
  • den kaso ku bo ta bai traha komo boluntario òf komo stazjèr
  • bira mayor di kriansa òf pa adopshon di un yu
  • bira miembro di un klup di tiramentu
  • petishon pa un pèrmit di arma (di kandela)

Bo no por pidi un deklarashon pa laga skrin bo mes, bo amigunan òf bo famia.

Kon mi ta pidi un Deklarashon Tokante Kondukta (VOG)?

Bo ta hasi un petishon por eskrito pa un Deklarashon Tokante Kondukta (VOG) pa medio di entregá un formulario di petishon kompletamente yená na Gabinete di Gezaghèber na Plaza Reina Wilhelmina 1. E formulario di petishon ku bo tin mester bo por download riba wèpsait di Entidat Públiko Boneiru www.bonairegov.com òf pasa busk’é komo hardcopy na Ofisina Prinsipal di Gobernashon.

Bo por entregá bo petishon pa bo Deklarashon Tokante Kondukta (VOG) riba e siguiente dianan:
Djamars        08:30 – 11:00 i 14:00 – 16:00 or
Djárason       08:30 – 11:00 i 14:00 – 16:00 or

Bo ta hasi un petishon digital pa un Deklarashon Tokante Kondukta (VOG) dor di yena e formulario di petishon kompletamnete i email esaki na vog-bonaire@bonairegov.com

Edat pa hasi petishon pa un Deklarashon Tokante Kondukta (VOG)

For di 12 aña por hasi petishon pa un Deklarashon Tokante Kondukta (VOG). Den kaso di personanan di 12 te ku 17 aña e petishon mester ta akompañá pa firma di e mayor i/òf gezaghèber.  

Un otro hende por hasi petishon pa un Deklarashon Tokante Kondukta (VOG) pa mi?

Bo por laga un otro hende entregá bo petishon pa Deklarashon Tokante Kondukta (VOG) solamente si bo apoderá e persona ei pa hasi esei. Pa esaki bo tin ku usa e formulario standarte di apoderashon. Bo por haña e formulario aki riba wèpsait di Entidat Públiko Boneiru (lenk).

Na bo nòmber e apoderado ta hasi e petishon pa e  Deklarashon Tokante Kondukta (VOG) serka Gabinete di Gezaghèber. Ora di hasi entrega di e petishon pa medio di e formulario di apoderashon aki bo tin ku presentá e siguiente dokumentunan:

  • un kopia di bo prueba di identidat (sédula)
  • un kopia di e prueba di identidat (sédula) di e apoderado

Kuantu un Deklarashon Tokante Kondukta (VOG) ta kosta?

Artíkulo 32 di e Lei Dokumentashon Hudisial i Deklarashonnan Tokante Kondukta BES (Wet Justitiële documentatie en Verklaringen omtrent het gedrag BES) i e areglo kompensashon atministrativo entrega di deklarashon tokante kondukta BES ta stipulá ku entrante 15 di febrüari 2013 ta pidi un kompensashon pa petishon di un Deklarashon Tokante Kondukta (VOG). E kompensashon pa un Deklarashon Tokante Kondukta (VOG) ta $10.

Mester depositá e suma aki riba kuenta nr. 406.287.06 na:

  • Maduro & Curiel’s Bank Bonaire na nòmber di:
  • Verklaringen Omtrent Gedrag (VOG)
  • Openbaar Lichaam Bonaire
  • Plasa Reina Wilhelmina 1

Mester paga e kompensashon promé ku entregá e petishon pa un Deklarashon Tokante Kondukta (VOG). Esaki ta un eksigensia pa tuma un petishon pa un Deklarashon Tokante Kondukta (VOG) den tratamentu. Bo ta paga pa e gastunan ku Gabinete di Gezaghèber ta hasi ora ku nan tuma bo petishon den tratamentu. Pues bo no ta paga pa e Deklarashon Tokante Kondukta (VOG), pero pa tratamentu di bo petishon.

Buska bo Deklarashon Tokante Kondukta (VOG)

Ta konsehá bo pa informá promé si bo Deklarashon Tokante Kondukta (VOG) ta kla!

Mester buska e Deklarashon Tokante Kondukta (VOG) personalmente na ofisina di Gabinete di Gezaghèber na Plaza Reina Wilhelmina 1. No ta posibel pues pa entregá e Deklarashon Tokante Kondukta (VOG) digitalmente.

Ora di bin tuma e Deklarashon Tokante Kondukta (VOG) bo tin ku mustra bo karta komo prueba di entrega di e petishon i bo prueba di identidat (sédula).

Si un otro hende ta bin tuma bo Deklarashon Tokante Kondukta (VOG), e apoderado mester presentá e siguiente dokumentunan:

  • formulario di apoderashon
  • kopia di bo prueba di identidat (sédula)
  • karta komo prueba di entrega di e petishon pa bo Deklarashon Tokante Kondukta (VOG)
  • kopia di prueba di identidat (sédula) di e apoderado

E dianan pa bin tuma e Deklarashon Tokante Kondukta (VOG) ta komo lo siguiente:

Djamars        08:30 – 11:00 i 14:00 – 16:00 or
Djárason       08:30 – 11:00 i 14:00 – 16:00 or

Dikon un dunadó di trabou tin ku yena un parti di e Deklarashon Tokante Kondukta (VOG)?

Un dunadó di trabou ta responsabel pa skrinmentu di su trahadónan. Dependiente di e tareanan ku e trahadó ta bai ehersé, e dunadó di trabou ta stipulá riba kiko mester skrin un trahadó. Riba e formulario di petishon pa Deklarashon Tokante Kondukta (VOG) e dunadó di trabou mester indiká riba kua aspektonan di funshon e ke laga skrin e trahadó en kestion. Pa sierto sektornan manera enseñansa nan a traha profilnan spesífiko pa skrinmentu. Banda di esei tin un profil general pa skrinmentu.  

Kon mi por hasi petishon pa un Deklarashon Tokante Kondukta (VOG) si mi no ta inskribí den PIVA?

Si bo no ta aparesé den registrashon di persona na Registro Sivil (PIVA), òf si bo no tin un lugá di biba òf keda vast, bo no por hasi petishon pa un  Deklarashon Tokante Kondukta (VOG).

Kon mi por hasi petishon pa un Deklarashon Tokante Kondukta (VOG) pa emigrashon, pa un visa òf pa un pèrmit di trabou den eksterior?

Pa hasi petishon pa un Deklarashon Tokante Kondukta (VOG) pa emigrashon, pa un visa òf pa un pèrmit di trabou tin reglanan spesial. Personanan ku ta hasi petishon no tur ora ta logra entregá un formulario di petishon ku un representashon di den eksterior a yena i firma. E ora ei e persona ku ta hasi petishon mes por yena e formulario di petishon pa emigrashon. E ora ei adishonalmente na e formulario di petishon e persona ku ta hasi petishon mester entregá un formulario ku ta indiká kiko e meta di e petishon ta.  

Kon mi ta pidi un Deklarashon Tokante Kondukta (VOG) si mi ta biba den eksterior?

Si Boneiru tabata bo último lugá di biba bo por hasi un petishon pa  un Deklarashon Tokante Kondukta (VOG) via un apoderado. E ora ei den e kaso aki na lugá di un prueba di inskripshon bo tin ku presentá un Deklarashon di Lugá di Biba.

Ki ora mi ta haña un Deklarashon Tokante Kondukta (VOG) i ki ora nò?

Bo ta haña un Deklarashon Tokante Kondukta (VOG) si for di e investigashon resultá ku bo no tin echonan kastigabel riba bo nòmber. Si tin kestion di echonan kastigabel, e ora ei Gezaghèber ta husga si esakinan ta relevante pa e meta pakiko a pidi e deklarashon. Pa un dosente por ehèmpel otro echonan kastigabel ta di importansia kompará ku pa e funshon di akountent. Si e echonan kastigabel ku nan a enkontrá ta relevante pa e meta pa kua a pidi e deklarashon i nan ta kai dentro di e término di wak bèk, e ora ei bo no ta haña un Deklarashon Tokante Kondukta (VOG).  

Por entregá mi  Deklarashon Tokante Kondukta (VOG) den idioma ingles òf den un otro idioma?

Ta entregá e Deklarashon Tokante Kondukta (VOG) únikamente den idioma hulandes, ku un agregashon na ingles.

Tratamentu di e petishon / Finalisashon di e prosedura

E prosedura di tratamentu ta tuma mas òf ménos 5 siman. E persona ku a hasi e petishon mes mester informá pa e Deklarashon Tokante Kondukta (VOG) i e mes mester bin tuma esaki na Ofisina Prinsipal di Gobernashon. Si no bin tuma e Deklarashon Tokante Kondukta (VOG) (dentro di 3 luna), ta warda e Deklarashon Tokante Kondukta (VOG).

Opheshon i apelashon

Si bo no ta di akuerdo ku e desishon riba bo petishon, dentro di 14 dia despues di a risibí e notifikashon bo por entregá un keho por eskrito na Korte di Promé Instansia di Boneiru, Saba i Sint Eustatius (artíkulo 25 Lei di Dokumentashon Hudisial i deklarashonnan tokante kondukta - artikel 25 van de Wet Justitiële Documentatie en verklaringen omtrent gedrag).