Kuido

Kuido di kachó
Un kachó salú ta un kachó bon kuidá. Fuera di bon kuminda i awa fresku pa bebe, un kachó tambe mester di atenshon, moveshon, training i un lugá seif na kas.

Kuminda
Tin diferente tipo di kuminda pa kachó, kuminda seku di kachó, kuminda di bleki i karni di fris. Kuminda seku duru ta kontené tur loke e kachó mester i ta bon pa su djente. Bo ke malkriá e kachó ku algu èkstra un bia? Skohe e ora ei por ehèmpel pa un kuki pa kachó òf un snèk pa kachó. Por haña esaki den supermerkado òf un tienda di bestia.

Hua, siña, sosegá na tempu i druming
Un pùpi ainda mester siña tur kos i esei ta nifiká ku bo ta pèrdè hopi tempu ku edukashon di e kachó chikitu. Un pùpi ke deskubrí i preferibel ta hunga henter dia, pero tambe mester drumi na tempu. For di entrenamentu unda pa hasi su nesesidat te ku siña ‘sinta’, ‘drumi’ i ‘bini aki’. Tur kos mester siñ’e. Mihó manera pa siña un kachó ta dor di entrenamentu positivo. Informá serka e entrenadónan di kachó riba e isla. Nan ta duna kurso pa pùpi.

Bo ta opta pa un kachó adulto? E ora ei tambe ta importante pa wak kua komando básiko e kachó ta komprondé. Un kachó adulto ainda por siña hopi kos. Invertí tambe den e laso di konfiansa. Den kaso di problema ku e komportashon di e kachó, tambe por informá pa tep i ayudo serka un di e entrenadónan di kachó riba e isla. Nan ta duna kurso básiko i avansá tambe.

Un lugá seif na kas
Un kurá ku un bon tranké for di kua e kachó no por sali ta esun di mas ideal. Pero esei no tur ora ta posibel. Bo ke mara e kachó? E ora ei ta importante pa sòru pa un bon lugá den sombra i un linia seif, por ehèmpel un waya di stal peso lihé i un banchi ku un hèspu di heru. Un kadena por brua den otro pone ku e kachó kisas no por yega na su lugá den sombra, su baki di awa òf –di kuminda mas.

Bo kachó ku ta kana lòs regularmente ta purba sali for di kurá? Kontrolá bo tranké regularmente. Prevení tambe ku nan por subi riba un muraya. Ta konsehabel pa pega algu rondó riba e muraya asina ku e patanan no tin nada pa gara.

Moveshon
Si e kachó ta pasa gran parti di dia na un kadena, ta importante pa duna e kachó moveshon kada dia. Esei ta posibel por ehèmpel dor di hunga òf kana keiru. Un kachó mester di impreshonnan nobo. Fastidio por pone ku e kachó ta kuminsá mustra komportashon no adekuá. Un bida únikamente na un kadena ta limitá un kachó den su komportashon natural.