Edukashon

Komandonan básiko 
Ora bo tuma un kachó den kas, sigur si ta un pùpi, bo mester siña e kachó hopi kos. Un pùpi ta keda serka e kachó mama te ku mas o ménos 7 pa 8 siman. Di e kachó mama i e rumannan e kachó ta siña kon pa komportá. Si e kachó bira parti di un famia, e kachó mester siña komportá ku miembronan di famia i kisas otro bestia di kas. Laga e bestia hañ’e den tur sorto di situashon. 

Kastigá i rekompensá
Un kachó ta siña mihó ora rekompensá bon komportashon. Ignorá komportashon ku bo no ke. Òf por ehèmpel bisa ‘nò’ riba un tono severo. Dal un kachó no ta yuda. E ta pone ku e kachó ta haña miedu di bo. Bo ke hustamente pa e kachó konfia bo i bo ke traha riba un relashon kuné.

Ta hopi hèndi ora un kachó konosé algun komando básiko. Pensa por ehèmpel na ‘sinta’, ‘laga bai’, ‘keda’ i ‘bini aki’. Riba e isla tin kursonan pa pùpi. Bo ta siña di un forma agradabel i práktiko kon e kachó por skucha bo mas mihó.

Traha riba konfiansa
Ta kita un pùpi for di su mama i su rumannan i no ta fásil pa e kustumá ku e situashon nobo na kas. P’esei ta importante pa bo duna e pùpi tempu i atenshon i asina poulatinamente por krea konfiansa ku e kachó.