Q2 2025 aktualisashon malesanan infeksioso

Q2 2025 aktualisashon malesanan infeksioso

Dengue

Den e di dos kuartal di aña 2025 ménos hende a bai nan dòkter di kas ku keho di un malesa di sangura, manera dengue. Tabatin sententidos kaso konfirmá di infekshon ku dengue. Den luna di aprel mas hende tabatin dengue kompará ku luna di mei i yüni. Notabel ta ku te ainda tur siman tin hende ta haña dengue, miéntras ku den e periodo tras di lomba tin ménos yobida. Pa e motibu akí GGD Boneiru ta pidi siudadanonan pa keda alerta pa posibel lugánan di brui rònt di nan kas.

Rebultashon di kueru

E kantidat di mucha (0 pa 4 aña) ku a bai nan dòkter di kas ku keho di rebultashon di kueru, den e kuartal akí tabata algu mas ku den e lunanan yanüari te mart.Tin ora ta sosodé ku na un krèsh òf akohida pa mucha tin kestion di un brote di malesa di man, pia i boka, sende paga òf otro malesa ku ta saka mancha. Na momentu ku GGD Boneiru risibí un señal di esaki, GGD Boneiru ta investigá si tin kestion di un brote. Tambe nan ta duna konseho i informashon na e krèsh òf akohida pa mucha tokante medidanan adekuá.

Bakunashon pa biahero

E brote di e vírùs di kentura hel den e áreanan São Paulo, Brazil i Tolima, Colombia te ainda ta andando (fuente: PAHO). Na kuminsamentu di luna di yüni un biaha mas GGD Boneiru pa medio di un komunikado di prensa a trese e bakunashon kontra kentura hel bou di atenshon di biaheronan ku ta bai Suramérika. Entre aprel i yüni mas ku tresshentisinkuenta persona a akudí na e konsulta pa biahero di GGD Boneiru. Ta trata akí en partikular di biahenan pa Colombia, Peru, Panama i Honduras.

Grip i Covid

Den e promé tres luna di e aña akí dos biaha mas tantu hende a bai nan dòkter di kas ku keho respiratorio, kompará ku den e lunanan aprel, mei i yüni. Mayoria hende tabatin molèster di un vírùs di Rhino/Entero, un vírùs di grip òf di SARS-CoV-2. Esakinan ta vírùs hopi komun (di fèrkout). No ta konosí si a interná hende ku grip den hòspital. Internashonalmente nan ta vigilando un variante nobo di SARS-CoV-2., e NB.1.8.1 (‘Nimbus’). No tin informashon konosí si e supvariante akí ta hasi hende mas gravemente malu (fuente: WHO).