Dekreto di Establesimentu i Aktividat BES

Dekreto di Establesimentu i Aktividat

For di 1 di aprel 2024 empresanan na Boneiru, Sint Eustatius i Saba tin ku tene nan mes na e reglanan nobo di medio ambiente. E reglanan akí bo ta haña den e Dekreto di Establesimentu i Aktividat BES (IAB BES) i e areglo di establesimentu i aktividat BES (RIA BES). A traha e reglanan akí pa protehá nos medio ambiente mas mihó.

Kiko ta e IAB BES?

E IAB BES ta konsistí di reglanan klarito ku ta splika kon empresanan tin ku kuida medio ambiente adekuadamente. E reglanan akí ta basá riba e Lei bibienda públiko, ordenamentu teritorial i maneho di medio ambiente BES. E meta ta pa sòru ku empresanan ta ehekutá nan aktividatnan sin hasi daño na medio ambiente.

Kiko esaki ta nifiká pa bo empresa?

Si bo tin un empresa, ta importante pa sa kiko e reglanan nobo akí ta nifiká pa bo. Nan ta bai entre otro tokante di:

• Kon bo tin ku anda ku produktonan residual i ku awa shushi.
• Kua ta e produktonan residual ku bo tin ku tene separá.
• Medidanan pa almasená supstansianan peligroso na un maner a seif.
• Evitá polushon di suela.
• Evitá molèster di sonido.

Na unda bo ta haña mas informashon?

Bo por haña tur detaye tokante e IAB BES i e RIA BES den Staatscourant i den Staatsblad. Pa mas informashon tokante e reglanan akí, bishitá wèpsait di Punto di Informashon Medio Ambiente: https://infomilcn.com.

Bo tin pregunta?

Pa tur bo preguntanan tokante e IAB BES bo por akudí tur dia di trabou entre 08:00 or i 12:00 or na e Punto di Informashon Medio Ambiente di Kámara di Komèrsio. Bo por hasi bo preguntanan online tambe via wèpsait di Punto di Informashon Medio Ambiente.

Ta importante pa nos traha huntu riba un ambiente di biba mas limpi i mas seif. Pa medio di kumpli ku e reglanan nobo akí, bo empresa ta kontribuí aktivamente na esaki.