Digitalisashon EPB

Tim di digitalishon na Boneiru ta traha desidido i ku determinashon!

Na kuminsamentu di mart di e aña akí Kolegio Ehekutivo di Entidat Públiko Boneiru a lanta e Grupo di Trabou Digitalisashon Entidat Públiko Boneiru multidisiplinario. E grupo di trabou aki ta guia digitalisashon di gobièrnu di Boneiru den e direkshon korekto i ta sòru pa implementashon di esaki kana na un manera rápido i efisiente. Habitantenan i empleadonan na Boneiru ta entusiasmá ku e promé resultadonan. Por ehèmpel ya kaba habitantenan via e wèpsait nobo por download vários formulario digitalmente i manda esakinan bèk.

Pa promové un digitalisashon rápido, e grupo di trabou a haña komo tarea pa na promé lugá inventarisá e prosesonan di trabou di Entidat Públiko Boneiru i kaminda ta posibel digitalisá esakinan ku ayudo di e ‘zaaksysteem JOIN’. Banda di esei ta konektá diferente ‘vakapplicatie’ den e departamentonan na esaki. Tambe e grupo di trabou ta okupá su mes ku desaroyo i ponementu di formulario online riba wèpsait di Entidat Públiko Boneiru pa engrandesé e aksesibilidat digital pa habitantenan. E tim ta proveé tambe e komunikashon i treinennan nesesario pa usuario.

Promové forsa di ehekushon

Pa hopi aña kaba Boneiru ta konfrontá desafionan grandi riba tereno di digitalisashon. Den e akuerdo intergubernamental 2018-2020 a inkluí digitalisashon spesífikamente komo punto di atenshon, en partikular pa fortalesé e forsa di ehekushon den Entidat Públiko Boneiru. E Kolegio Ehekutivo aktual tambe ta mira hopi bentaha di bon digitalisashon, tantu internamente dentro di Entidat Públiko Boneiru komo tambe den direkshon di habitantenan di nos isla. Pa e motibu akí a inklui esaki tambe spesífikamente den Programa di Gobernashon 2019-2023.

Aspirashon di e grupo di trabou ta pa ku un aserkamentu dinámiko introdusí e ‘Digitaal Zaakgericht Werken’ (Traha Digitalmente ku Enfoke riba Kaso) ku ta kubri henter e organisashon. E forma di traha akí ta pone e fundeshi nesesario pa un implementashon akselerá di un servisio (digital) efisiente i efikas, ku – te asina leu ku ta posibel – a base di proyekto ta outomatisá e prosesonan di trabou na un nivel ku ta surpasá direktorado.

Punto di salida ta pa via outomatisashon di e prosesonan di trabou engrandesé e efisiensia i forsa di ehekushon di e aparato públiko. Hasiendo asina ta mehorá tambe e servisio den direkshon di nos habitantenan. E wèpsait nobo di Entidat Públiko Boneiru ta bai fungi komo un lokèt elektróniko kaminda habitantenan digitalmente por regla nan asuntunan ku gobièrnu.

Metanan realisá

For di su lantamentu e Grupo di Trabou Digitalisashon Entidat Públiko Boneiru den tempu kòrtiku ya kaba a logra realisá algun asuntu importante. Por ehèmpel den ménos ku 2 luna despues di e komienso, esta dia 22 di aprel último, e wèpsait nobo di Entidat Públiko Boneiru a bai live. Den e ‘zaaksysteem JOIN’ e grupo di trabou a desaroyá 30 proseso ku formulario elektróniko korespondiente, di manera ku habitantenan por hasi petishon online via e wèpsait nobo. Ta trata tur e prosesonan akí kompletamente dentro di e ‘zaaksysteem’. Den futuro e wèpsait ta bai fungi tambe komo lokèt elektróniko.

Finalmente e grupo di trabou a integrá un modúlo pa traha sita den wèpsait di Entidat Públiko Boneiru, kaminda habitantenan por traha sita online na Registro Sivil pa diferente servisio. E intenshon ta pa sigui desaroyá e módulo pa traha sita akí pa henter e aparato públiko. Riba 1 di novèmber último, for di momentu di lansamentu di e wèpsait, ya kasi 9.000 persona a traha un sita online. Realisashon di e metanan akí a krea sosten serka habitantenan di Boneiru, i internamente den Entidat Públiko Boneiru esaki a sòru pa mas entusiasmo ainda pa digitalisashon.

‘Dia 1 di novèmber EPB a konta ku kasi 9.000 persona a traha un sita onlain den seis luna’

Digitalisashon di pèrmitnan di evento

E prosesonan na departementu JAZ ku ta digitalisá, ta: 

Digitalisashon di pèrmitnan ekonomiko

E pèrmitnan ekonomiko ku ta digitalisá, ta: 

Digitalisashon di pèrmitnan infrastruktural

E pèrmitnan infrastruktural tambe ta keda digitalisá. E pèrmitnan ku lo keda digitalisá ta:

  • Pèrmit di konstrukshon
  • Pèrmit naturalesa i medio ambiente (pendiente pa keda kla)
  • Pèrmit pa monumentonan (pendiente pa keda kla)
  • Petishon pa tereno (planiá pa 2022)
  • Pèrmit pa koba (planiá pa 2022)
  • Pèrmit pa desmantelá (planiá pa 2022)
  • Pèrmit di instalashon (planiá pa 2022)

Konferensia di prensa 01 novèmber 2021

Riba djaluna 01 novèmber 2021, diputado Hennyson Thielman a presentá e trabounan hasí pa entidat públiko Boneiru relashoná ku digitalisashon di EPB. Aki bou por wak e konferensia di prensa bèk:

Desaroyo mas aleu di digitalisashon

E Grupo di Trabou Digitalisashon Entidat Públiko Boneiru a pone komo meta pa su mes pa na fin di e aña akí ofresé tur servisio den direkshon di habitantenan i empresarionan den un forma online i digitalisá esakinan den e ‘zaaksysteem’. E trayekto di konseho interno tambe mester ta prosesá den e ‘zaaksysteem’ e ora ei. Ku inisio di e programa Inklushon Digital e grupo di trabou ke ‘trese komunidat aserka’ i hasié konsiente di importansia di digitalisashon. Mas aleu pa fin di aña 2021 pa medio di videonan di informashon i grabashonnan di instrukshon, e grupo di trabou ke logra mehorashon di suministro di informashon relashoná ku e prosesonan di trabou di Entidat Públiko Boneiru.

Plannan pa aña 2022

Na aña 2022 e grupo di trabou ke hasi un komienso ku un ‘MijnOverheid’ pa Boneiru. Riba e portal akí aworó habitantenan i empresarionan mes mester por ‘login’ pa sigui entre otro státùs di nan petishonnan i pa tira bista den nan datonan personal, tereno di hür, èrfpagt i vehíkulonan ku ta registrá na Entidat Públiko Boneiru, risibí notifikashon importante ora ku fecha di ekspirashon di por ehèmpel un pasport, un prueba di identidat (sédula) òf reibeweis ta aserkando, i pa paga impuesto online.

Tambe na aña 2022 e grupo di trabou ke hasi un komienso ku instalashon di un sentro di kontakto pa kliente pa Entidat Públiko Boneiru. Di e manera akí por trata e preguntanan mas komun i simpel di habitantenan i empresarionan den un forma mas rápido. Banda di esei e grupo tin komo meta tambe pa na aña 2022 konstruí un intranèt pa un mihó komunikashon interno dentro di e aparato públiko.