Kordinadó di Intervenshon na RIEC CN
Bo ta e profeshonal ku komo kordinadó di intervenshon na Regionaal Informatie en Expertise Centrum Caribisch Nederland (RIEC CN) ta kordiná kasonan, konektá partnernan i presentá solushonnan kreativo kontra kriminalidat ku ta destabilisá? Bo tin afinidat ku siguridat i bo tin gana di kontribuí na un komunidat resiliente na e islanan BES? E ora ei t’abo nos ta buskando!
Kiko bo ta bai hasi?
Komo kordinadó di intervenshon na RIEC CN (Sentro Regional di Informashon i Ekspertisio Hulanda Karibense) bo tin un ròl klave den atendementu ku kriminalidat ku ta destabilisá. Bo ta fungi komo e punto sentral den e ret, i huntu ku nos partnernan bo ta sòru pa un aserkamentu efektivo i integral di e kasonan. Bo ta duna guia na e parti operashonal i na e konsulta di kaso di RIEC CN, bo ta kordiná e proseso for di señal te intervenshon i bo ta sòru pa un bon raportahe. Huntu ku e partnernan bo ta determiná kua ta e aserkamentu ku ta mas adekuá i bo ta sinkronisá e maneho ku e partnernan. Bo ta traha estrechamente huntu ku e analista integral i e empleado di legislashon di RIEC CN i bo ta aportá aktivamente na kompartimentu di konosementu ku e partnernan. Banda di esaki bo ta duna un aporte aktivo na ehekushon di e plan di proyekto 2022-2025 i tambe na e plan stratégiko di 2026-2028. Bo ta responsabel pa e temanan prioritisá i pa elaborashon di e supproyektonan rònt di aserkamentu di kaso i kompartimentu di informashon. Bo ta vigilá e progreso, bo ta duna konseho tokante opstákulonan relashoná ku maneho i opstákulonan atministrativo i kaminda ta nesesario bo ta formulá dokumentu pa toma di desishon. Bo ta mantené aktivamente e kolaborashon entre e partnernan, bo ta hala nan atenshon pa loke ta trata nan responsabilidatnan i bo ta hasi palabrashonnan klarito. Tambe bo ta señalá sierto tendensianan den e kasonan, bo ta bini ku proposishon pa mehorashon i bo ta stimulá inovashon den e aserkamentu. Bo ta ehersé aktividatnan ku ta den liña ku e funshon i ta posibel ku ta enkargá bo ku otro trabounan relevante riba petishon di bo hefe.
E organisashon
RIEC CN ta un laso di kolaborashon pa un aserkamentu integral i atministrativo di kriminalidat organisá ku ta destabilisá. Dentro di e laso di kolaborashon e entidatnan públiko Boneiru, Sint Eustatius i Saba, Ministerio Públiko BES, Kuerpo Polisial Hulanda Karibense, KMar, Servisio di Impuesto/Duana Hulanda Karibense, SZW, FIU NL, Wardakosta i Servisio di Imigrashon i Naturalisashon Hulanda Karibense ta kombatí e tipo di kriminalidat akí. RIEC CN ta di, pa i atraves di e partnernan, i huntu nan ta traha pa logra un Hulanda Karibense mas seif. Te ku aña 2028 RIEC CN ta funshoná komo un organisashon di proyekto, i for di aña 2029, den kaso di funshonamentu efektivo i efisiente, ta kontinuá kuné komo laso di kolaborashon strukturá.
Entidat Públiko Boneiru ta aktua komo organisashon di maneho. Pa e ehekushon i e sosten relashoná ku algun tarea di maneho, e ofisina di RIEC CN ta hasi un apelashon riba e servisio sentral di Entidat Públiko Boneiru. Bo ta traha pa e ofisina di RIEC CN i temporalmente bo ta den servisio di Entidat Públiko Boneiru. Si bo ta den servisio serka un partner di konbenio di RIEC CN, e ora ei eventualmente destakamentu ta posibel.
Loke nos ta ofresé bo
Na RIEC CN/Entidat Públiko Boneiru nos ta haña apresio importante. Bo ta ripará esaki na bo sitio di trabou, pero tambe den e rekompensa ku bo ta haña pa bo trabou. Si bo no ta kumpli ku tur e eksigensianan ku ta kuadra ku e funshon akí, nos ta hasi uso di un eskala inisial. Esaki ta eskala 9 i ta trata di minimalmente $ 3225 i maksimalmente $ 4185 pa luna. E salario regular pa e funshon akí ta kai den eskala 10 i ta sòru pa un salario di minimalmente $ 3825 i maksimalmente $ 4625 pa luna. Den kaso di bon funshonamentu i despues di optené eksperensia relevante, tin posibilidat pa krese yega e salario máksimo pa e funshon akí. Esaki ta eskala 11 i ta trata di minimalmente $ 4390 i maksimalmente $ 5240. Banda di esaki bo por konta ku:
• Sèn di vakansi di 8,33%;
• Un ‘13ᵉ maand’ kompleto;
• 168 ora di vèrlòf i 5 dia èkstra di vèrlòf stipulá adelantá;
• Un areglo di penshun ekselente;
• Un siman di trabou fultaim di 36 ora;
• Un nombrashon temporal di 1 aña ku bista riba prolongashon den kaso di bon funshonamentu i un evaluashon positivo.
E salario ta a base di bo formashon, abilidat i eksperensia. Repartishon di bo siman di trabou ta fleksibel i lo keda stipulá den konsulta ku bo hefe. Banda di esei nos tin algun otro kondishon laboral sekundario atraktivo, tokante kua gustosamente nos ta konta bo mas durante bo prosedura di solisitut!
Kiko ta e eksigensianan
• Bo ta mustra liderazgo, sensitividat polítiko, kreatividat i bo ta konektivo, ku enfoke riba resultado, desididu i ku enfoke riba solushon;
• Bo ta traha i pensa riba nivel di HBO (preferibelmente riba tereno di derecho atministrativo, derecho penal i/òf lei di impuesto);
• Eksperensia amplio ku kordinashon dentro di un organisashon di ret, ku partnernan di kadena i timnan multidisiplinario;
• Afinidat komprobabel ku problemátikanan tokante kombatimentu di kriminalidat, aserkamentu integral di destabilisashon, siguridat i habitabilidat;
• Konosementu di e mundu di gobernashon públiko, polis, ministerio públiko i servisio di impuesto, di e posibilidatnan di intervenshon penal, atministrativo i fiskal i di prosesonan di toma di desishon den ambientenan atministrativo kompleho, partikularmente tambe na Hulanda Karibense;
• Un bon reputashon: bo ta konosí komo íntegro, bo ta di komportashon intachabel i bo ta anda sumamente kuidadoso ku informashon sensibel;
• Afinidat komprobabel ku Hulanda Karibense;
• Konosementu i dominio aktivo di hulandes, papiamentu, ingles i eventualmente spañó;
• Den kaso ku bo no ta papia papiamentu, bo ta dispuesto pa siña esaki dentro di 1 aña;
• Bo por traha bon ku sistemanan digital.
Loke ta importante tambe pa sa
• Un assessment i un kontròl di referensia ta forma parti di e prosedura di solisitut;
• Bo mester por entregá e diplomanan ku bo a logra i ku ta menshoná den bo CV;
• Bo mester por entregá un deklarashon tokante kondukta (VOG).
Sí! Mi ke e trabou akí
Nos ta anhelá pa risibí bo solisitut. Manda bo CV huntu ku bo motivashon promé ku 1 di sèptèmber 2025 na solliciteren@bonairegov.com.
Bo tin duda ainda òf bo ke haña mas informashon tokante e funshon? E ora ei tuma kontakto ku e hefe di RIEC CN, sr A. Lopez, via +599 701 3606 òf Aquiles.Lopez.rieccn@bonairegov.com.
