Entidat Públiko Boneiru (EPB) a disidí pa lanta un Instituto, i kiko ta e meta prinsipal di esaki?
Entidat Públiko Boneiru (EPB), a disidí pa lanta un Instituto di Idioma pa koordiná, sostené i implementá maneho di idioma di Boneiru. E Instituto di Idioma tin un gran balor sosial, pasó idioma ta un parti esensial di identidat i un instrumento pa atkirí/optené konosementu, pero tambe pa konektá hende ku otro i pa tin igual akseso na servisio. Su meta prinsipal ta protehá, fortalesé i promové uso di papiamentu den enseñansa, gobièrnu i komunidat.
E instituto lo fungi komo sentro di konosementu i koordinashon pa maneho di idioma na Boneiru. E lo koordiná desaroyo di idioma, sostené implementashon den diferente sektor sosial, monitoriá i evaluá progreso, i fungi komo konekshon entre gobièrnu i komunidat.
Den e promé añanan, e enfoke lo ta riba fortifikashon di papiamentu komo idioma materno, kargadó di identidat i idioma di instrukshon i pa atkirí konosementu. Basá riba esaki, e instituto lo desaroyá gradualmente den un outoridat multilingwe den kua lo integrá tambe hulandes, ingles i spañó.
Dikon papiamentu, segun e teksto, tin un posishon spesial den komunidat boneriano?
Papiamentu ta identidat di mayoria di e poblashon na Boneiru i e medio pa transmití nos herensia. Papiamentu ta okupá un posishon spesial, pasobra e ta e idioma mátriks, e idioma materno i ku esei e idioma inklusivo di Boneiru. Esaki debí ku e ta e lenga materno òf e idioma di kas mas importante di mayoria boneriano i e promé òf di dos idioma di kas mas importante di kasi poblashon komletu di e isla. E funshon di idioma mátriks ta bira ainda mas importante den un komunidat ku kada aña ta bira mas diverso.
Kiko ta e ambishon stipulá den e akuerdonan intergubernamental pa aña 2030?
E ambishon ta, ku entrante 2030 niun mucha no ta bandoná skol mas, sin sa lesa i skirbi papiamentu. Esaki ta nifiká ku tur mucha ku kaba skol básiko mester por lesa, skirbi, papia, komprondé i spèl na nivel básiko di Boneiru. Esaki ta nivel 1F di e Kuadro di Referensia Papiamentu. Na nivel di skol sekundario, e meta ta pa e muchanan logra un nivel mas haltu (2F) den e mesun abilidatnan.
Kua ròl importante Instituto di Idioma lo bai hunga pa logra e meta riba tereno di alfabetisashon?
Pa logra e ambishon aki, e akuerdo intergubernamental tin diferente meta relashoná ku enseñansa. Un di e ambishonnan ta, pa fortalesé e kompetensia di dosentenan di papiamentu, registrá nan nivel di idioma, kreá posibilidat pa desaroyo profesional i forma un ret di dosente di papiamentu.
Instituto di Idioma ta koordiná entre otro proyektonan, desaroyá material edukativo, duna konseho riba maneho di idioma i stimulá kolaborashon entre skolnan, gobièrnu i otro organisashonnan. E instituto ta kombiná i sostené konosementu i ekspertisia relashoná ku papiamentu. Esaki lo kontribuí pa mas mucha dominá papiamentu na e nivel deseá.
Huntu ku Gobièrnu di Reino, e instituto lo bai realisá tur e puntonan aki. Mas detaye lo sigui, asina ku lante e instituto.
Ken den komunidat ta responsabel pa garantisá ku na 2030 tur mucha por lesa i skirbi papiamentu bon?
Henter komunidat ta responsabel pa esaki: idioma no ta biba solamente den skol, pero tambe na kas, den bario, den organisashonnan sosial i den bida diario.
Mayor-, welo- i wela-, dosente-, direktiva- di skol, organisashon- sosial i kultural, medio- di komunikashon, ‘influensers’, gobièrnu- lokal i Gobièrnu di Reino, tur tin un ròl importante. Tur hende ku ta usa papiamentu, ta kontribuí na realisashon di e ambishon aki.
Sin sa, bo tambe tin un influensia grandi riba bon uzo di papiamentu. Pa e motibu akí mucha por skucha òf lesa e idioma optimalmente, loke ta kontribuí na nan karera eskolar. Asina finalmente nan ta kaba skol ku un bon dominio di diferente abilidat lingwiístiko.
Kon mayor-, welo- i welanan ta kontribuí na e transpaso di idioma na kas?
Mayor-, welo- i welanan ta kontribuí dor di papia papiamentu ku muchanan, lesa huntu ku nan, konta kuenta i traspasá tradishon, kustumber i konosementu di un generashon pa otro.
Asina papiamentu i nos herensia kultural ta keda bibu i ta traspasá nan di generashon pa generashon.
Kiko ta e ròl ku skol-, dosente-, organisashonnan sosial, gobièrnu i prensa tin den promoshon di papiamentu?
Skol- i dosentenan tin e tarea, pa guia mucha den desaroyo di nan abilidatnan di lesa, skirbi, papia, skucha i spèl na papiamentu. Nan mester sigui mehorá nan propio dominio di papiamentu i nan abilidat pa duna lès.
Organisashonnan sosial por organisá debate, tayer di skirbi kreativo, tayer pa mayor tokante lesamentu interaktivo ku muchanan, presentashon di buki, charla tokante historia di papiamentu i otro eventonan na papiamentu.
Gobièrnu (tantu riba nivel lokal komo di Reino) ta responsabel pa aktualisá e maneho di idioma, sigui evaluá e ambishonnan den e Akuerdo Intergubernamental i pone rekursonan disponibel pa ehekutá proyektonan. Banda di esaki Gobièrnu di Reino tin e ròl tambe pa desaroyá método i material konforme e Kuadro di Referensia Papiamentu pa muchanan di skol.
E Instituto di Idioma lo ehekutá implementashon di e maneho di idioma i sigui skucha e señalnan di komunidat, ku atenshon speshal pa e nesesidatnan di papiamentu.
Medionan di komunikashon tin un ròl importante pa promové bon uso di papiamentu i pa hasi uzo di un ortografia ofisial konsistente.
P’esei tur e sektornan menshoná mester promové uso aktivo i korekto di papiamentu, stimulá lesamentu i skirbimentu, i usa e idioma den komunikashon, enseñansa i aktividatnan sosial.
Dikon ta importante pa usa ortografia ofisial di papiamentu konsistente?
Uso konsistente di e ortografia ofisial ta garantisá komunikashon kla i uniforme. E ta yuda ora di duna lès, ora di produsí material edukativo i den uso diario di idioma.
Si tur hende skirbi segun e mes reglanan, papiamentu ta bira mas fuerte, mas komprendibel i mas fásil pa siña.
Na kiko un bon enseñansa na papiamentu ta kontribuí pa e muchanan i e komunidat boneriano?
Bon enseñansa na papiamentu ta kontribuí na preservashon di e idioma, mihó desaroyo di idioma, mihó resultado eskolar i un base mas fuerte pa siña otro idiomanan. Ademas, e ta fortalesé identidat i konosementu di nos herensia kultural. Esaki no ta benefisiá solamente e mucha, sino tambe henter komunidat boneriano.
Kua entidat- i instansianan ta traha huntu pa realisá fortifikashon di papiamentu?
Pa logra e metanan aki, diferente organisashon i instansia ta kontribuí a base di nan propio responsabilidat i ekspertisia. Entre nan tin Entidat Públiko Boneiru (EPB), skol-, fundashon- kultural, organisashon- sosial, ministerionan di Gobièrnu di Reino i e futuro Instituto di Idioma.
P.e: Fundashon Akademia Papiamentu, Fundashon Lesa ta dushi, Biblioteka Públiko Boneiru, FuHiKuBo.
Aunke aktualmente no tin un struktura formal di kolaborashon entre tur e partnernan, nan ta trahando na diferente manera riba e mes meta: fortalesé, desaroyá i preservá papiamentu. Den futuro, e Instituto di Idioma lo haña un ròl importante pa konektá e diferente inisiativanan, stimulá kolaborashon i uni e esfuersonan na un manera mas struktural i duradero.
