Riba djamars 13 di òktober 2026 Kolegio Ehekutivo a risibí sekretario di estado Eric van der Burg di Asuntunan Interno i Relashonnan den Reino i su delegashon pa un bishita di trabou. Durante e konsulta nan a papia tokante progreso di e akuerdo atministrativo entre Boneiru i Reino, bon gobernashon i desaroyo di nos isla. Nan a papia tambe tokante kiko Entidat Públiko Boneiru tin mester pa krese huntu ku e desaroyo rápido di Boneiru.
Kolegio Ehekutivo a duna un splikashon di e trabounan ku entretantu a kuminsá i di e plannan pa e periodo binidero. Den esaki nan a papia entre otro tokante desaroyo di transporte públiko, siguridat di koriente i fortifikashon di prosesonan finansiero i ehekushon di e palabrashonnan for di e akuerdo atministrativo.
Un tópiko importante tabata fortifikashon di e organisashon atministrativo i e organisashon públiko. Boneiru su kresementu rápido ta rekerí un organisashon ku por reakshoná riba e nesesidatnan ku ta oumentando di habitantenan i e desafionan ku ta bini huntu ku esakinan. Kolegio Ehekutivo i e sekretario di estado a deliberá tokante kua ta e medidanan ku Entidat Públiko Boneiru mes ta tuma i na unda kolaborashon i sosten mas aleu for di Reino ta nesesario. Den esaki tabatin atenshon tambe pa integridat atministrativo i fortifikashon di forsa di ehekushon pa debidamente ehekutá palabrashonnan hasí.
Kòmbersashon ku gezaghèber
Promé ku e konsulta ku Kolegio Ehekutivo, gezaghèber John Soliano a papia separadamente ku sekretario di estado Van der Burg. E kòmbersashon akí a enfoká riba e situashon atministrativo na Boneiru, bon gobernashon i fortifikashon di atministrashon públiko.
E bishita di trabou ta suprayá importansia di un bon kolaborashon entre Boneiru i Reino. Ámbos partido ta sigui komprometé nan mes pa desaroyo mas aleu di Boneiru i pa un mihó futuro pa nos isla i su habitantenan.
